मुंबईत थंडी ओसरली

सकाळ वृत्तसेवा
​मुंबई, ता. १७ : गेल्या काही दिवसांपासून जाणवत असलेली थंडी काहीशी कमी झाली आहे. मुंबईतील किमान तापमानात वाढ झाल्याने दिवसा आणि पहाटे जाणवणारी थंडी कमी झाली आहे; मात्र रात्री हवेत सुखद गारवा कायम आहे.

भारतीय हवामान विभागाने (आयएमडी) दिलेल्या ताज्या आकडेवारीनुसार, सांताक्रूझ येथे किमान तापमान १८.४ अंश सेल्सिअसची नोंद झाली आहे. काही दिवसांपूर्वी हा पारा १५ अंशांपर्यंत खाली घसरला होता. तापमानात झालेली ही वाढ बोचरी थंडी कमी करण्यास कारणीभूत ठरली असून, रात्री उशिरा वाऱ्याचा वेग वाढल्याने गारव्याचा अनुभव कायम आहे.
दक्षिण मुंबईतील कुलाबा भागात तापमान २२.० अंश सेल्सिअस असून, तेथे आर्द्रता अधिक असल्याने रात्रीचे हवामान अधिक सुसह्य झाले आहे. हवामान विभागाच्या मते, वाऱ्याच्या दिशेत बदल झाल्यामुळे किमान तापमानात ही वाढ झाली आहे. पुढील दाेन-तीन दिवस मुंबईतील तापमान १८ ते २० अंशांच्या दरम्यान राहील.
दरम्यान, रत्नागिरी (२१) आणि डहाणू (१६.६) या किनारपट्टी भागातही थंडी कमी झाली असून, डोंगराळ भाग असलेल्या माथेरानमध्ये (१८.२) रात्रीचा गारवा अधिक तीव्र असून, पर्यटकांची तेथे मोठी गर्दी होत आहे.
----
‘दुहेरी ऋतू’चा अनुभव
हवामानातील या बदलामुळे मुंबईत आता ‘दुहेरी ऋतू’चा अनुभव येत असून, दुपारी उन्हाचा चटका जाणवत असल्याने नागरिक एसी आणि पंख्यांचा वापर करू लागले आहेत. सूर्य मावळल्यानंतर हवेत पुन्हा गारवा निर्माण होत असल्याने रात्री घराबाहेर पडताना अजूनही हलक्या उबदार कपड्यांचा आधार घ्यावा लागत आहे.