सातारा कारवाईवरून
गुन्हे शाखेचा खुलासा

मुंबई, ता. १७ : जावळी तालुक्यातील सावरी गावात एमडी अमली पदार्थ तयार करण्याचा कारखाना उद्ध्व‌स्त केल्यानंतर राजकीय पटलावर झालेल्या आरोप-प्रत्यारोपांनंतर गुन्हे शाखेने बुधवारी खुलासा केला आहे. तपासात दरेगावचे सरपंच रणजित शिंदे यांचा सहभाग निदर्शनास आलेला नाही. कारखान्यावर कारवाईदरम्यान उल्लेख झालेल्या ओंकार डिगे याची चौकशी करण्यात आली; मात्र त्याचा सहभाग निष्पन्न न झाल्याने अटक करण्यात आली नाही. एमडी कारखान्यातून तीन आरोपींना अटक करण्यात आली. त्यांच्याकडे सहा हजार रुपये सापडले. हा पंचनामा स्थानिक पोलिस ठाण्याचे प्रभारी अधिकारी आणि दोन पंचांसमोर करण्यात आला. प्रक्रियेनुसार व्हिडिओग्राफीही करण्यात आली. सावधगिरी म्हणून अटक आरोपींची नावे जाहीर करण्यात आली नव्हती, असे गुन्हे शाखेने म्हटले आहे. तसेच, आरोपींना तेजयश हाॅटेलमधून जेवण पुरविले जात होते, हे तपासात निष्पन्न झालेले नसल्याचेही गुन्हे शाखेने म्हटले आहे.