बाजारपेठांमध्ये नाताळचा उत्साह
सजावटीचे साहित्य खरेदीसाठी गर्दी
सकाळ वृत्तसेवा
मुंबई, ता. २३ : दोन दिवसांवर येऊन ठेपलेल्या नाताळ सणासाठी ठेवण्यात आलेल्या रंगीबेरंगी साहित्याने मुंबईतील बाजार सजले आहेत. क्रॉफर्ड मार्केट, दादर, वांद्रे, भुलेश्वर या बाजारपेठांमधील रस्ते गर्दीने फुलले आहेत.
वेगवेगळ्या प्रकारचे सजावटीचे साहित्य या रस्त्यावर विक्रीसाठी ठेवण्यात आले आहे. हा सण घरोघरी साजरा होत असल्याने संपूर्ण घराला सजावट केली जाते. ख्रिस्ती बांधव खूप उत्साहात हा सण साजरा करतात.
रस्ते, चर्च परिसर, घरे आणि बाजारपेठा आकर्षक सजावटीने उजळून निघाल्या आहेत. नाताळच्या खरेदीमध्ये नवीन कपडे, भेटवस्तू, घराच्या सजावटीचे साहित्य आणि गोड पदार्थ व फराळाच्या साहित्य खरेदीचा समावेश असतो. ख्रिश्चन बांधव डिसेंबरच्या सुरुवातीपासूनच तयारी करतात. यात प्रार्थना आणि घरातील स्वच्छतेचाही समावेश असतो.
या वेळी होली रीट, बेल्स, प्रभू येशू आणि मेरी यांच्या मूर्ती, सांताक्लॉजचे कपडे, चांदणी, खेळणी, सांताक्लॉजचा मुखवटा, ख्रिसमस बॉल्स, ट्री आणि टोप्या तसेच छोटे-मोठे ख्रिसमस ट्री, गवानी, रंगीबेरंगी पताका, मुखवटे, हेअर बँड, लाल रंगाचे फुगे, मॅजिक स्टिक, मास्क, आर्टिफिशियल मेणबत्त्यांना मागणी वाढली आहे. दुकानांमधील सजावट आणि रोषणाईही आकर्षण ठरत आहे. नाताळच्या शुभेच्छा देण्यासाठी ख्रिस्ती बांधवांकडून मिठाई, चॉकलेट आणि केकची खरेदी मोठ्या प्रमाणावर केली जात असल्याने नाताळासाठी खास केक विक्रीसाठी ठेवण्यात आले आहेत.
सीएसएमटी येथील मंगलदास रोड लोअर चाळ या ठिकाणी खरेदीसाठीची गर्दी पाहायला मिलत आहे. नोव्हेंबर २० पासूनच या बाजारात सजावटीचे साहित्य यायला सुरुवात झाली होती. त्यानंतर १ डिसेंबरपासून खरेदीसाठी हळूहळू गर्दी होत आहे. ख्रिस्ती बांधव रिटा गोमेंझो म्‍हणाल्‍या, की आम्ही वसईच्या गावात राहतो. आम्हाला घरी क्रिप्स बनवावे लागतात. त्यात आम्हाला फायबर किंवा मातीपासून तयार केलेले येशू आणि इतर कुटुंबीयांच्या मूर्ती ठेवाव्या लागतात. इथे कमी किमतीत मूर्ती मिळतात. त्यामुळे आम्ही इथे खरेदीसाठी आलो आहोत.

ख्रिसमस ट्रीची चलती
सजावटीच्या साहित्यात सर्वात महत्त्वाचे असते ते ख्रिसमस ट्री. यंदा ख्रिसमस ट्रीची किंमत १,२०० रुपयांपासून ते थेट १८ हजारांपर्यंत आहे. उंचीनुसार ख्रिसमस ट्रीची किंमत असते, असे ख्रिसमस ट्रीचे विक्रेते सांगतात. लहान मुलांसाठी टोप्या, ख्रिसमस घड्याळ, ख्रिसमस ट्री सजवण्यासाठी लागणारे गिफ्ट बॉक्स अशा सजावटीच्या साहित्याची विक्री सुरू आहे.

टोप्यांचे आकर्षण
नाताळ सणासाठी टोप्यांचे खास आकर्षण असते. यात छोट्या-मोठ्या आकाराच्या टोप्या भेटतात. मोठ्या टोप्यांची किंमत ६० रुपयांपासून ते ८० रुपये, छोट्या टोप्या ३० रुपये अशी किंमत आहे. तसेच होली रिंग्ज ४०० रुपयांना विकल्या जात आहेत. १०० रुपयांना दोन घंट्या विक्रीसाठी उपलब्ध आहेत. डिसेंबर महिन्यापासून खरेदीसाठी लोक येतात, असे विक्रेते सलीम अली खान यांनी सांगितले.

कृत्रिम मेणबत्ती
सर्व कृत्रिम साहित्य असल्याने स्वस्तात ग्राहकांना वस्तू दिल्या जातात. कृत्रिम मेणबत्त्याही आकारानुसार मिळतात. पाच इंचाच्या दोन मेणबत्त्यांची किंमत १८० रुपये आहे. दोन स्टार्स १५० रुपये अशी किंमत आहे, असे विक्रेता सांगतात.

स्टार कंदिलांची जोरदार खरेदी
१ डिसेंबरपासून स्टार कंदिलांना फक्त मुंंबईतूनच नाही तर गोवा, सातारा, कऱ्हाड या ठिकाणांहून प्रचंड मागणी आहे. छोटा कंदील १५ रुपयांपासून ते मोठा कंदील हजारांपर्यंत इथे विकला जातो. सर्वात आधी गोव्यातील ख्रिस्ती बांधव इथे खरेदीला येतात. त्यानंतर स्थानिक मुंबईकरही दाखल होतात, असे कंदील विक्रेत्‍यांनी सांगितले.