प्रतिबंधित पदार्थांची विक्री झाल्यास अधिकाऱ्यांवर कठोर कारवाई
मंत्री नरहरी झिरवाळ यांचा इशारा

सकाळ वृत्तसेवा
मुंबई, ता. २३ : राज्यात बंदी असलेल्या गुटखा आणि तत्सम अमली पदार्थांवर कडक कारवाई करण्यासाठी अन्न व औषध प्रशासन विभाग सज्ज झाला आहे. यापुढे प्रतिबंधित पदार्थ सापडल्यास त्या संबंधित क्षेत्रातील अधिकाऱ्यांवर निलंबनाची कारवाई करण्यात येणार असल्याचा इशारा अन्न व औषध प्रशासन विभागाचे विशेष सहाय्य मंत्री नरहरी झिरवाळ यांनी अधिकाऱ्यांना दिला आहे.
अधिकाऱ्यांच्या कार्यक्षेत्रात प्रतिबंधित अन्नपदार्थांची विक्री होत आहे, असे निर्दशनास आल्यास त्या कार्यक्षेत्रातील सर्व संबंधित अधिकाऱ्यांना जबाबदार धरण्यात येईल आणि त्यांच्यावर कारवाई करण्यात येईल, असे परिपत्रकही मंत्री झिरवाळ यांच्या निर्देशानंतर काढण्यात आले आहे. याअंतर्गत सर्व विभागीय सहआयुक्त (अन्न) यांना प्रतिबंधित अन्नपदार्थांची छुप्या पद्धतीने व अवैध मार्गाने विक्री, साठा व वाहतूक करणाऱ्या व्यावसायिकावर प्रभावीपणे कारवाई करण्याचे आदेश अन्न सुरक्षा आयुक्त श्रीधर दुबे पाटील यांनीही परिपत्रकाद्वारे दिले आहेत. सहआयुक्त (अन्न), सहाय्यक आयुक्त (अन्न) व अन्न सुरक्षा अधिकाऱ्यांनी आपापल्या कार्यक्षेत्रातील अन्न आस्थापनांची तपासणी करावी तसेच त्यांनी त्यांच्या कार्यक्षेत्रात प्रतिबंधित अन्नपदार्थांची विक्री, साठा व वितरण होणार नाही, याबाबत दक्षता घ्यावी आणि प्रतिबंधित अन्नपदार्थांच्या बंदीबाबत आदेशाची प्रभावी अंमलबजावणी करावी, असे आदेश मंत्री नरहरी झिरवाळ यांनी दिले होते.