धारावीतील स्कायवॉक म्हाडासाठी नाकापेक्षा मोती जड!
पालिका म्हणते स्ट्रक्चरल ऑडिट करा किंवा ७५ लाखांचे शुल्क द्या
सकाळ वृत्तसेवा
मुंबई, ता. २७ : एमएमआरडीएने दिलेल्या ३० कोटी रुपयांच्या निधीतून म्हाडाने सहा वर्षांपूर्वी धारावीत स्कायवॉक उभारला आहे. हा स्कायवॉक आता म्हाडासाठी नाकापेक्षा मोती जड या उक्तीप्रमाणे ठरू लागला आहे. काम पूर्ण झाल्यानंतर पुढील देखभाल-दुरुस्तीसाठी हा स्कायवॉक पालिकेने ताब्यात घेणे अपेक्षित होते. त्यानुसार म्हाडाने पालिकेला संपर्क केला असता या स्कायवॉकचे स्ट्रक्चरल ऑडिट करा; मगच आम्ही ताबा घेऊ किंवा स्ट्रक्चरल ऑडिटसाठी ७५ लाख रुपयांचे शुल्क देण्याची मागणी केली आहे.
धारावीकरांना सहजपणे माहीम स्थानकात पोहोचता यावे, यासाठी म्हाडाने अभ्युदय बँकेपासून माहीम स्थानकापर्यंत सुमारे दीड किलोमीटर लांबीचा स्कायवाॅक उभारला आहे. त्याचा शाळकरी मुलांसह धारावीकरांकडून माहीम स्थानक किंवा पूर्वेकडून पश्चिमेकडे जाण्यासाठी याचा वापर केला जात आहे. हा स्कावाॅक आता पालिकेला हस्तांतरित होणार असल्याने त्याच्या देखभाल-दुरुस्तीची जबाबदारी पालिकेवर असणार आहे. दरम्यान, म्हाडाने हस्तांतरणाबाबत म्हाडाला पत्र दिले असता, त्यांनी या स्कायवॉकचे स्ट्रक्चरल ऑडिट करूनच आम्ही ताबा घेऊ किंवा ७५ लाख रुपयांच्या शुल्काची मागणी केली असल्याचे म्हाडाच्या एका अधिकाऱ्याने सांगितले.

म्हाडाचे एमएमआरडीएला पत्र
म्हाडाने एमएमआरडीएने दिलेल्या निधीच्या माध्यमातून स्कायवॉक उभारला आहे. त्यामुळे पालिकेने मागणी केलेले स्कायवॉकचे स्ट्रक्चरल ऑडिट शुल्क एमएमआरडीएने द्यावे, असे पत्र म्हाडाने दिले आहे.