पश्चिम रेल्वेवर पुन्हा
बनावट पास; गुन्हा दाखल
सकाळ वृत्तसेवा
मुंबई, ता. १० : पश्चिम रेल्वेच्या तिकीट तपासनीस पथकाने बनावट यूटीएस पास वापरणाऱ्या महिला प्रवाशाला रंगेहाथ पकडले. चर्चगेट-विरार लोकलमध्ये ही घटना घडली असून, या घटनेमुळे बनावट तिकिटाद्वारे फसवणुकीचा प्रकार पुन्हा उघडकीस आला आहे.
पश्चिम रेल्वेच्या मुंबई विभागातील तिकीट तपासनीस दीपाली मूर्ती यांनी गुरुवारी (ता. ८) सकाळी चर्चगेटच्या दिशेने जाणाऱ्या जलद लोकलच्या महिला प्रथम श्रेणीच्या डब्यात तपासणी केली. या वेळी एका महिला प्रवाशाने मोबाईलवर यूटीएस अ‍ॅपवरील एसी लोकल पास दाखवला; मात्र मूर्ती यांना त्याबाबत संशय आला. त्यांनी विचारणा केली असता प्रवाशाने उडवाउडवीची उत्तरे दिली. अखेर वांद्रे स्थानकात त्यांना उतरून अधिक चौकशी करण्यात आली. अधिकाऱ्यांनी संबंधित यूटीएस पासची पडताळणी केली असता तो बनावट असल्याचे निष्पन्न झाले. त्यानंतर संबंधित महिलेने आपली चूक मान्य केली. हा बनावट पास मैत्रिणीने तयार करून दिल्याचे त्यांनी सांगितले. याप्रकरणी प्रवासी आणि तिच्या मैत्रिणीविरोधात गुन्हा दाखल करण्यात आला असून पुढील तपास सुरू आहे.