विकलेले पण वापर नसलेले भूखंड म्हाडा घेणार ताब्यात
पुन्हा ई-लिलाव करण्याची कोकण मंडळाची योजना
सकाळ वृत्तसेवा
मुंबई, ता. २० : म्हाडाकडून शाळा, रुग्णालय, सार्वजनिक सुविधा केंद्र अशा वेगवेगळ्या कारणासाठी आपल्या भूखंडाची ई-लिलावद्वारे विक्री केली जाते. मात्र, त्यापैकी अनेक भूखंडांवर अद्याप कोणतेच बांधकाम केले नाही. तसेच त्यांचा वापर वेगळ्या कारणासाठी केला जात असल्याचे समोर आले आहे. त्यामुळे वापर नसलेले भूखंड काढून घेण्याच्या हालचाली म्हाडाच्या कोकण मंडळाने सुरू केल्या असून, त्याची पुन्हा ई-लिलावद्वारे विक्री केली जाणार आहे.
म्हाडाच्या कोकण मंडळाचे ठाणे, नवी मुंबई, कल्याण, मिरा-भाईंदर, विरार, पनवेल अशा वेगवेगळ्या ठिकाणी भूखंड आहेत. विकास अरखाड्यानुसार अनेक भूखंडांवर शाळा, मैदान, रुग्णालय, सुविधा केंद्र अशी वेगवेगळी अरक्षणे पडली आहेत. त्यामुळे म्हाडाने सदर भूखंड आरक्षित वापरासाठी ई-लिलावद्वारे विक्री केले आहेत. मात्र, अनेक भूखंडांचा वेगवेगळ्याच कारणासाठी वापर होत असल्याचे निदर्शनास आले आहे, तर काही भूखंडांचा वापर केला जात नाही. त्यामुळे नियमानुसार संबंधितांवर कारवाई करून ते भूखंड काढून घेतले जाणार असल्याची माहिती म्हाडाच्या कोकण मंडळाचे मुख्य अधिकारी डॉ. विशाल राठोड यांनी दिली. दरम्यान, कोकण मंडळांतर्गत असलेल्या अनेक भूखंडांची विक्री झालेली नाही. वर्षानुवर्षे ते पडून आहेत. त्याबाबतही लवकरच योग्य निर्णय घेण्यात येणार आहे.

भुईभाडे, सेवा शुल्क न भरणाऱ्यावर कारवाई
अनेक भूखंड धारकांकडून म्हाडाला भुईभाडे, सेवा शुल्क भरले जात नाही. त्यामुळे त्यांच्यावर कारवाई करून भूखंड काढून घेण्याचा निर्णय घेण्यात आला आहे. सदर भूखंड ई-लिलावदारे पुन्हा विक्री करून महसूल उभा करण्याचा म्हाडाचा विचार आहे.