म्‍हसळ्यात आरटीओकडून कारवाईमध्ये दुजाभाव
माजी सभापती महादेव पाटील यांची खासदारांकडे तक्रार
म्हसळा, ता. १ (बातमीदार) ः म्हसळा, श्रीवर्धन तालुक्यातील स्थानिक व्‍यावसायिकांच्या गाड्यांवर आरटीओकडून कारवाई करण्यात येत आहे, मात्र श्रीवर्धन तालुक्यात उत्खनन करण्यात येत असलेल्या मायनिंगमिश्रित मातीची (बॉक्स साइड) वाहतूक करणाऱ्या अवजड वाहनांवर पेण आरटीओ कार्यालयाकडून योग्य ती कारवाई होत नसल्याची तक्रार म्हसळा तालुका माजी सभापती महादेव पाटील यांनी केली आहे. नुकतेच याप्रकरणी त्‍यांनी खासदार सुनील तटकरे यांच्याकडे याप्रकरणी लेखी पत्र दिले आहे.
म्हसळा, श्रीवर्धन तालुक्यात मोठ्या प्रमाणावर छोटे-मोठ्या व्‍यावसायिकांची संख्या सर्वाधिक आहे, मात्र त्‍यांच्या वाहनांवर येथील आरटीओकडून अनेक त्रुटी दाखवत सर्रास कारवाई केली जाते, मात्र तोच न्याय श्रीवर्धन तालुक्यात उत्खनन करण्यात येत असलेल्या मायनिंगअंतर्गत मातीमिश्रित (बॉक्स साइड) वाहतूक करणाऱ्या अवजड वाहनांवर दिसून येत नाही. त्‍यांच्‍याकडे पेण आरटीओकडून दुर्लक्ष केले जात असल्याने अन्‍य वाहतूकदारांकडून रोष व्‍यक्‍त केला जात आहे. म्हसळा, श्रीवर्धनमधील राज्य व राष्ट्रीय मार्गावर मागील दोन महिन्यांत मायनिंग वाहतूक करणाऱ्या अनेक अवजड वाहनांचे अपघात झाले आहेत. यामध्ये मोठ्या प्रमाणात वित्त व मनुष्यहानी झाल्याच्या घटना घडल्या आहेत, मात्र तरीदेखील आरटीओ अधिकारी या वाहनांवर कोणतीही ठोस कारवाई करताना दिसून येत नाही. यामधील अनेक वाहनांची वाहतूक क्षमता व मुदत संपली (स्क्रॅप) असताना, त्‍या रस्‍त्‍यावर बिनदिक्‍कत धावत आहेत, मात्र या गाड्यांवर आरटीओ अधिकारी कारवाई करताना दिसून येत नाहीत. याप्रकरणी म्हसळा तालुका माजी सभापती महादेव पाटील यांनी थेट खासदार सुनील तटकरे यांच्याकडे लेखी तक्रार केली आहे.