नाईक-अंतुले महाविद्यालयात स्मार्ट गुंतवणूक कार्यशाळा
म्हसळा, ता. २४ (बातमीदार) : म्हसळा येथील वसंतराव नाईक कला, वाणिज्य आणि बॅरिस्टर ए. आर. अंतुले विज्ञान महाविद्यालयात डि. एल. ई. विभाग व एन. एस. एस. विभागाच्या संयुक्त विद्यमाने स्मार्ट गुंतवणूक विषयावर कार्यशाळेचे आयोजन करण्यात आले. विद्यार्थ्यांना भावी आयुष्यात मिळणाऱ्या उत्पन्नाचे शहाणपणाने नियोजन कसे करावे, फसवणूक टाळण्यासाठी काय खबरदारी घ्यावी आणि गुंतवणुकीबाबत सजग राहण्यासाठी काय शिकायला हवे, याविषयी सखोल मार्गदर्शन करण्यात आले.
ही कार्यशाळा कन्झुमर गाईडन्स सोसायटी ऑफ इंडिया यांच्या पुढाकाराने आयोजित करण्यात आली होती. या वेळी टी. आर. पांडे (प्रोजेक्ट मॅनेजर) व प्राची मयेकर (ट्रेनर) यांनी विद्यार्थ्यांना गुंतवणुकीतील मूलभूत तत्त्वांपासून ते आधुनिक बाजारव्यवस्थेपर्यंत सविस्तर माहिती दिली. प्राथमिक व दुय्यम शेअर बाजारातील फरक, अधिक परतावा देणाऱ्या शेअर्सची निवड कशी करावी,
म्युच्युअल फंडात गुंतवणुकीचे प्रकार, यशस्वी गुंतवणूकदाराचे आवश्यक गुण, डिमॅट खाते उघडण्याची प्रक्रिया, सेबीचे कार्य व बाजार व्यवस्थापन, ५०-३०-२० नियोजन सूत्राचे महत्त्व, राहत्या घराला गुंतवणुकीत न समाविष्ट करण्याची कारणे आदीबाबत मार्गदर्शन करण्यात आले. या वेळी प्राची मयेकर यांनी ‘‘गुंतवणूक ही मनाला मारून केलेली नसावी, तर मनाला आनंद देणारी असावी’’, असा महत्त्वपूर्ण सल्ला देत विद्यार्थ्यांचे प्रबोधन केले.