मनोर, ता. १९ (बातमीदार) : युवा-शक्ती प्रतिष्ठानच्या वतीने रविवारी (ता. १९) मनोर-पालघर रस्त्यावरील चहाडे नाका येथे शिवजयंती उत्सव साजरा करण्यात आला. जयंती उत्सव साजरा करण्यासाठी चहाडे नाका येथे तयार केलेल्या देखाव्यात शिवछत्रपतींची प्रतिमा स्थापन करण्यात आली होते. भगवे फेटे परिधान केलेल्या युवकांनी शिवरायांचा जयजयकार करीत शिवछत्रपतींच्या प्रतिमेचे पूजन करण्यात आले. जयंती उत्सवात पालघर तालुक्याच्या पूर्वेकडील गावांमधील युवकांनी मोठ्या संख्येने सहभाग घेतला होता.
किल्ले वसई मोहीम परिवाराच्या सदस्यांकडून उपस्थित युवकांना शिवाजी महाराजांचे कर्तृत्व, इतिहास आणि गडकिल्ल्यांची माहिती देण्यात आले. पालघर जिल्ह्यातील गडकिल्ले मराठा साम्राज्य आणि इतिहासाची साक्ष देत आहेत. गडकिल्ल्यांवर पर्यटक आणि स्थानिकांकडून मद्यसेवन करून गडकिल्ल्यांचे पावित्र्य नष्ट केले जात आहे. काही मोजके युवक गडकिल्ल्यांचे संवर्धन आणि पावित्र्य राखण्यासाठी पुढे येताना दिसत आहेत. शिवराय घराघरात पोहण्यासाठी शिवरायांचे कर्तृत्व समजून घेत इतिहासाची साक्ष देत उभ्या असलेल्या गडकिल्ल्यांच्या संवर्धन मोहिमांमध्ये सहभाग घेण्याचे आवाहन या वेळी करण्यात आले.