सकाळ वृत्तसेवा
नवी मुंबई, ता. १० : यंदाच्या आर्थिक वर्षात मालमत्ता कर विभागाने मागील वर्षीपेक्षा १०७ कोटी १७ लाख रुपये अधिक उत्पन्न मिळवत उत्पन्नाचा विक्रम प्रस्थापित केला. विशेष म्हणजे ही विक्रमी घोडदौड सुरू असून आर्थिक वर्षाच्या पहिल्या दहा दिवसांमध्ये तब्बल दहा कोटी रुपयांची वसुली करून पुन्हा विक्रमी नोंद केली आहे.
महापालिका आयुक्त राजेश नार्वेकर यांच्या मार्गदर्शनाखाली अतिरिक्त आयुक्त तथा मालमत्ताकर विभागाच्या प्रमुख सुजाता ढोले आणि त्यांच्या सहकार्‍यांनी अत्यंत नियोजनबद्ध काम करून उत्पन्नाचे उद्दिष्ट ५७५ कोटींपेक्षा अधिक ६३३ कोटी १७ लाख रुपयांची मालमत्ता करवसुली करण्यापर्यंत झेप घेतली. ३१ मार्च २०२३ या आर्थिक वर्षाच्या अखेरच्या एका दिवसात १८.९२ कोटी इतके उत्पन्न जमा करण्यात आले. हादेखील कररूपी महसूल संकलनाचा विक्रम होता. २०२३-२४ या आर्थिक वर्षासाठी ८०१ कोटी इतके उत्पन्न मालमत्ता करातून जमा होईल, असे उद्दिष्ट महापालिका राजेश नार्वेकर यांनी अंदाजपत्रक सादर करताना मालमत्ता कर विभागापुढे ठेवले आहे. त्या दृष्टीने मालमत्ता कर विभाग नियोजनबद्ध पावले टाकत आहे. याचीच परिणीती म्हणजे एप्रिल महिन्याच्या पहिल्या १० दिवसांत मार्च महिन्यातील करवसुलीची गतिमानता कायम राखत १० कोटी ५० लाख इतके उत्पन्न मालमत्ताकरापोटी जमा झाले आहे.

विकासाला हातभार लावा!
मालमत्ता कराची वसुली प्रभावीपणे करण्यासाठी विविध उपाययोजना राबविल्या जात आहेत. मालमत्ता कर हा महानगरपालिकेच्या उत्पन्नाचा सर्वात प्रमुख स्रोत असल्याने व करापोटी जमा होणाऱ्या महसुलामधूनच नागरी सेवा सुविधापूर्ती केली जाते. यासाठी नागरिकांनी आपला मालमत्ता कर विहित वेळेत भरून शहर विकासाला हातभार लावावा, असे आवाहन महापालिका आयुक्त राजेश नार्वेकर यांनी केले आहे.