ठाणे, ता. २० (वार्ताहर) : ठाणे शहरात बुधवारी (ता. १९) आगीच्या चार घटना समोर आल्या आहेत. सिनेवंडरलगतच्या ओरियन बिझनेस पार्क इमारतीत मंगळवारी (ता. १८) आग लागून अग्निशमन दलाची दमछाक झाली. सुमारे १२ तासांपेक्षा जास्त आगीचे धूमशान संपत नाही तोच बुधवारी चार घटना घडल्याने आपत्ती व्यवस्थापन आणि अग्निशमन दलाची चांगलीच दमछाक झाली होती.

बुधवारी सकाळी सव्वा नऊच्या सुमारास वागळे इस्टेटमधील काळूबाई कचरा स्पॉट या ठिकाणी कचऱ्याला आग लागली होती. घटनास्थळी अग्निशमन दलाचे जवान वाहनासह दाखल होत आगीवर नियंत्रण मिळवले. दुसरी आगीची घटना सकाळी साडेअकराच्या सुमारास वागळे इस्टेट या ठिकाणी लकी स्टार गॅरेजच्या इलेक्ट्रिक बॅटरीला आग लागली होती. आगीची तिसरी घटना दुपारी १२ वाजण्याच्या सुमारास नौपाडा येथील मँगो इलेक्ट्रॉनिक स्टोअर समोर असलेल्या महावितरणच्या डीपीला आग लागली होती. महावितरण कंपनीचे कर्मचारी, तसेच अग्निशमन दलाचे जवान यांनी आग त्वरित विझवली. आगीची चौथी घटना ढोकाळीतील मोहन मिल कंपाऊंडजवळील शरदचंद्र पवार स्टेडिअमसमोर कचऱ्याला, तसेच बाजूला उभ्या असलेल्या चार भंगार गाड्यांना आग लागली होती. अग्निशमन दलाच्या जवानांनी पूर्णपणे आग विझवली आहे.