डोंबिवली - शिंदे-फडणवीस यांचे सरकार कोसळणार असून राज्यात पुन्हा महाविकास आघाडीचे सरकार येणार, असा विश्वास राष्ट्रवादीचे आमदार अमोल मिटकरी यांनी व्यक्त केला. राज्याचे पुढचे मुख्यमंत्री अजित पवार असतील असेही त्यांनी सांगितले. कल्याण येथे एका कार्यक्रमानिमित्त आमदार मिटकरी आले होते. त्या वेळी त्यांनी पत्रकारांशी संवाद साधताना महाविकास आघाडीचे सरकार येऊन पुढचे मुख्यमंत्री अजित पवार असतील, असे विधान केले आहे.

सुप्रीम कोर्टाच्या निर्णयानंतर राज्यातील सरकार कोसळणार आहे. एकनाथ शिंदे हे जास्त दिवस मुख्यमंत्री राहणार नाहीत. मी अंदाज बांधत नाही; मात्र संविधानाचा जितका अभ्यास केला त्याप्रमाणे सुप्रीम कोर्टाला संविधानाच्या कक्षेच्या बाहेर जाता येऊ शकत नाही.

त्यामुळे हे सरकार अपात्र होऊन महाविकास आघाडीचे सरकार येणार आहे. अजित पवार असे नेते आहेत, की त्यांचा फोन बंद असला तरी अनेक लोकांचे पित्त खवळते. त्यांचा फोन बंद असल्याने त्यांच्यावर चर्चा होते, हाच त्यांचा मोठेपणा आहे. दादांनी त्यांची भूमिका स्पष्ट केली आहे. त्यामुळे मी आजही सांगतो, की महाराष्ट्राचे पुढचे मुख्यमंत्री अजित पवार असतील, असे ते म्हणाले.