सकाळ वृत्तसेवा
नवी मुंबई, ता. २२ ः नवी मुंबई महापालिका क्षेत्रात पावसाळापूर्व कामांच्या तयारी अंतिम टप्प्यात आली आहे. अशा परिस्थितीत दरडग्रस्त आणि धोकादायक भागांमध्ये राहणाऱ्या नागरिकांचे स्थलांतर करण्याचे आदेश पालिका आयुक्त राजेश नार्वेकर यांनी दिले आहेत.
आपत्ती व्यवस्थापन विभागाकडे महापालिका क्षेत्रातील १५ संभाव्य ठिकाणांची यादी प्राप्त झाली आहे. त्यामधील रमेश मेटल कॉरी परिसराला भेट देऊन आयुक्त राजेश नार्वेकर यांनी प्रत्यक्ष परिस्थितीची पाहणी केली. यावेळी पावसाळा सुरू होण्यापूर्वी खबरदारीचा उपाय म्हणून नागरिकांना सुरक्षित ठिकाणी स्थलांतर करण्याचे निर्देश आयुक्तांनी दिले. तसेच सर्व विभाग कार्यालयांतील दरड कोसळण्याची शक्यता असलेल्या ठिकाणी लक्ष ठेवण्याच्या सूचना केल्या आहेत. याप्रसंगी एमआयडीसी क्षेत्रात नेरूळ डी ब्लॉकमध्ये सुरू असलेल्या रस्ते काँक्रिटीकरण कामांचीही पाहणी नार्वेकर यांनी केली असून पावसाळ्यापूर्वी ही कामे पूर्ण करण्याचे निर्देश अभियांत्रिकी विभागाला दिले आहेत.