नेरळ ता. २८ (बातमीदार) ः माथेरान जवळ असलेल्या पेब किल्ल्यावर पाण्याच्या हौदात एक गाय पडली होती. याबाबत माहिती मिळताच नेरळ येथील शिवभक्त तरुण, माथेरान सह्याद्री रेस्क्यू पथकाने अंधारात मदतकार्य केल्‍याने गायीला जीवदान मिळाले. दरम्यान तरुणांनी दाखवलेल्या भूतदयेबद्दल त्यांचे कौतुक होत आहे.
सह्याद्रीच्या डोंगररांगेतील पेब किल्ल्यावर असलेल्या पाण्याच्या साठवण टाकीत एक गाय पडल्याची माहिती शिवदुर्ग मित्र मंडळ लोणावळा, अपघातग्रस्तांचा मदतीसाठी ग्रुप यांना मिळाली. त्‍यांनी नेरळ गावातील काही तरुणांसह घटनास्‍थळी दाखल होत गायीला हौदातून बाहेर काढण्यासाठी प्रयत्‍न सुरू केले. यात माथेरानमधील सह्याद्री बचाव पथकानेही सहभाग घेतला. गायीला हौदातून बाहेर काढण्यासाठी काहीजण हौदात उतरले, त्‍यानंतर दोराच्या साहाय्याने तरुणांनी गायीला बाहेर काढण्यात आले.