घणसोली, ता. १७ (बातमीदार) : घणसोली गावात महापालिकेच्या वतीने उद्यानाची उभारणी करण्यात आलेली नाही. यासाठी गावातील गुणली तलाव परिसरात महापालिकेने लहान मुलांसाठी काही मोजकी खेळणी बसवली आहेत. मात्र, त्‍या खेळण्यांचीही सद्यस्थितीत दुरवस्था झाल्याने नागरिकांमध्ये नाराजी पसरली आहे.
घणसोली गावातील गुणली तलाव परिसरात लहान मुलांना खेळण्यासाठी खेळणी बसवली आहेत. या खेळण्यांची दुरवस्था झाल्याने लहान मुलांना खेळताना अनेक अडचणींना सामोरे जावे लागत आहे. यामध्ये दुर्घटनेची शक्यता वर्तवली जात आहे. काही ठिकाणी खेळण्याची मोडतोड झाली आहे. पाळणाही एका बाजूने झुकलेला आहे. एवढ्या मोठ्या घणसोली गावाला लहान मुलांना खेळण्यासाठी केवळ तीन ते चार खेळणी असल्याने ग्रामस्थांनी पालिकेविरोधात राग व्यक्त केला. मुलांना खेळण्यासाठी योग्य सुविधा आणि जागा नसल्याने लहान मुलांचा हिरमोड होत आहे.

सुरक्षेचा अभाव
गुणली तलाव परिसरात रात्रीच्या वेळी नशेखोर तरुण मौजमजेसाठी येत असतात. या ठिकाणी दारूच्या बाटल्याही पडलेल्या आहेत. अशा वातावरणामुळे लहान मुलांवर परिणाम होण्याची शक्यता वर्तवली जात आहे. त्यात तलाव परिसराला कुंपण नाही. या ठिकाणी कोणतीही सुरक्षा नसल्याने मुलांच्या सुरक्षेचा प्रश्न निर्माण होत आहे.

घणसोली गावात लहान मुलांना केवळ चार खेळणी आहेत. त्या ठिकाणीही महापालिकेने सोयी-सुविधा पुरवण्यासाठी आखूडता हात घेतला आहे. मैदानात जागोजागी चिखल आहे. मुलांनी खेळायचे कसे? आता तर येथील खेळणीही तुटलेली आहेत.
- मयूर मढवी, अध्यक्ष, अभासे घणसोली विभाग

घणसोली गावातील गुणली तलाव परिसरात असलेल्या खेळण्यांचा वापर मोठ्या व्यक्तींकडून केला जातो. त्यामुळे खेळणी नादुरुस्त होत आहेत. चिखल झालेल्या ठिकाणी पाऊस कमी झाल्यावर दुरुस्ती करण्यात येईल.
- रमेश गुरव, अभियंता, नवी मुंबई पालिका घणसोली विभाग