ठाण्यात कोरोनाचा पसारा वाढतच असून आतापर्यंत ५६ रुग्णांची नोंद झाली आहे. बुधवारी नव्याने १३ रुग्ण आढळले आहेत. यामध्ये कोरोना जेएन.१चा एकही रुग्ण सापडलेला नसल्याने काहीसा दिलासा मिळाला आहे.

कोरोनाच्या पार्श्वभूमीवर ठाणे महापालिकेने संशयित रुग्णांच्या चाचण्यांची संख्या वाढवली आहे. आतापर्यंत १ हजार १६७ चाचण्या झाल्या असून आजच्या १३ नवीन रुग्णांसह ५६ जण पॉझिटिव्ह आढळले आहेत. त्यापैकी ३९ रुग्ण सक्रिय असून ३३ जण घरीच उपचार घेत आहेत. आज नव्याने आढळलेल्या १३ रुग्णांपैकी ९ जण घरी उपचार घेत असून पालिकेच्या रुग्णालयात दोन जण खासगी; तर दोन जण पालिकेच्या छत्रपती रुग्णालयात उपचार घेत आहेत.

ठाणे पालिका क्षेत्रात १३ नव्या रुग्णांची नोंद झाली असताना कल्याण-डोंबिवली पालिका क्षेत्रात दोन नवे कोरोना रुग्ण आढळले असून पाच रुग्ण सक्रिय आहेत; तर नवी मुंबई महापालिका क्षेत्रात दोन नव्या रुग्णाची नोंद करण्यात आली असून ४ रुग्ण सक्रिय आहे. जिल्ह्यात एकूण ४८ रुग्ण सक्रिय असल्याची माहिती जिल्हा प्रशासनाने दिली. (corona update thane)