Railway: तलाठी भरती घोटाळ्याप्रकरणी युवक काँग्रेसकडून पश्चिम रेल्वेच्या दादर स्थानकात मंगळवारी (ता. २३) रेल्वे रुळांवर उतरून रेल रोको आंदोलन करण्यात आले. त्यामुळे काही काळ लोकल खोळंबल्या होत्या. रेल्वे सुरक्षा दलाने तत्काळ आंदोलकांना बाजूला करून रेल्वे सेवा पूर्ववत केली. या आंदोलनामुळे पश्चिम रेल्वे डाऊन मार्गावरील लोकल सेवांना फटका बसला.

पश्चिम रेल्वेने दिलेल्या माहितीनुसार, मंगळवारी दुपारी ३ वाजण्याच्या सुमारास बोरिवली लोकल दादर रेल्वे स्थानकाच्या फलाट क्रमांक एकवर येत असताना दहा ते बारा आंदोलकांनी रुळांवर उतरत ती लोकल रोखून धरली. हे आंदोलन युवक काँग्रेसच्या कार्यकर्त्यांनी केले. रेल्वेरुळांवर मोठ्या संख्येने काँग्रेस कार्यकर्ते उतरल्याने पश्चिम रेल्वे वाहतूक ठप्प झाली होती; मात्र सुरक्षा दलाच्या जवानांनी लागलीच पावले उचलून सेवा पूर्ववत केली. आरपीएफ पोलिसांनी ताब्यात घेतलेल्या आंदोलकांना पुढील कारवाईसाठी दादर लोहमार्ग पोलिसांकडे सुपूर्द केले.

घोटाळ्यामागील सूत्रधार शोध!
तलाठी भरती घोटाळ्याची एसआयटी चौकशी करून घोटाळ्यामागील सूत्रधार शोधा, अशी प्रमुख मागणी करत युवक काँग्रेसच्या कार्यकर्त्यांनी रेल्वे रोको आंदोलन केले. यापूर्वी एमपीएससीच्या विद्यार्थ्यांनी सरकारविरोधात आंदोलन केले होते. त्यानंतर आता युवक काँग्रेसच्या आक्रमक झाली आहे.