Roha News: रेल्वे प्रशासनाकडून जमीन संपादित न करता शेतकऱ्यांच्या जागेतून संरक्षण भिंतीचे काम सुरू केल्याने तसेच ग्रामदैवत बापदेव महाराज मंदिराच्या दर्शनी भाग बंद करण्याचा प्रताप केल्याने संतापलेल्या अष्टमीकर जनतेने आक्रमक होत हल्लाबोल केला.

या घटनेचा तीव्र संताप व्यक्त करत ग्रामस्थांनी खासदार सुनील तटकरे व नामदार आदिती तटकरे यांची भेट घेऊन कैफियत मांडली. यावेळी आदिती तटकरे यांनी घटनास्थळी भेट देऊन जोपर्यंत जिल्ह्याधिकारी व रेल्वे खात्याचे वरिष्ठ अधिकारी यांची बैठक होत नाही. तोपर्यंत सदर काम तातडीने बंद करण्याचे आदेश रेल्वे प्रशासनाला दिले आहे. (aditi Tatkre)

रोहा रेल्वे स्‍थानकाच्‍या अष्टमी गाव हद्दीत काही दिवसांपूर्वी रेल्वे प्रशासनाने सीमेवर संरक्षण भिंतीचे बांधकाम सुरू केले आहे. संपादित जागेत संरक्षण भिंतीचे काम झाल्यानंतर लगतच्या शेतकऱ्यांना कोणत्याही प्रकारची पूर्वकल्पना न देता व जमीन संपादन न करता थेट भिंतीच्या बांधकामासाठी खोदकाम सुरू केले. नियोजित जागेपेक्षा १८ मीटर आत खोदकाम केल्याने शेतकरी ग्रामस्थांनी हल्लाबोल केला व या कामाला विरोध केला.

माजी नगराध्यक्ष संतोष पोटफोडे यांच्या नेतृत्वाखाली कामबंद मोहीम हाती घेण्यात आली. या दरम्यान मंत्री आदिती तटकरे यांनी घटनास्थळी भेट देऊन घटनेची सविस्तर माहिती घेतली. सदर जागा प्रस्‍ताविक असून संपादित नाही. त्‍यामुळे भूसंपादन नसताना व शेतकऱ्यांना याविषयी कोणतीही पूर्वकल्पना न देता काम सुरू केल्याची बाब शेतकऱ्यांनी मंत्री आदिती तटकरे यांच्या निदर्शनास आणून दिली.(Railway News)

रेल्वे प्रशासनाच्या मनमानी कारभाराबद्दल यावेळी तटकरे यांनी तीव्र नाराजी व्यक्त करून लवकरच जिल्हाधिकारी व रेल्वे खात्याचे वरिष्ठ अधिकारी यांच्याशी चर्चा करणार असल्‍याचे सांगितले.(railway News)

तसेच तोपर्यंत काम थांबविण्याचे आदेश आदिती तटकरे यांनी दिले. या वेळी माजी नगराध्यक्ष संतोष पोटफोडे, मुख्याधिकारी पंकज भुसे, रेल्वे खात्याचे असिस्टंट इंजिनीअर संजू सिंग, डिव्हिजनल इंजिनीअर पी. डी. वाडेकर, नगरपालिका अभियंता सुधीर भगत, अष्टमी ग्रामस्थ मंडळ अध्यक्ष महादेव साळवी, मुस्लिम समाज अध्यक्ष शफी पानसरे, मयूर दिवेकर आदी ग्रामस्थ मोठ्या संख्येने उपस्थित होते.