Panvel News: लोकसभा निवडणुकीच्या पार्श्‍वभूमीवर परिमंडळ-२ चे पोलिस उपायुक्त विवेक पानसरे आणि सहायक पोलिस आयुक्त अशोक राजपूत यांच्या मार्गदर्शनाखाली कळंबोली पोलिस ठाणे हद्दीत कोम्बिंग व ऑल आउट ऑपरेशन राबविण्यात आले.

त्यामध्ये कळंबोली पोलिसांनी सोन्याच्या दागिन्यांसह देशी बनावटीचे पिस्टल व तलवार हस्तगत केली आहे. कळबोली पोलिस ठाण्याचे वरिष्ठ पोलिस निरीक्षक राजेंद्र कदम, पोलिस निरीक्षक गजानन घाडगे यांच्यासह सात अधिकारी व २३ अंमलदार, तसेच कळंबोली वाहतूक शाखेचे दोन वाहतूक अंमलदार यांनी संयुक्तरित्या कळंबोली परिसरात ही कारवाई केली.

आरोपी अरबाज शेख याच्या ताब्यातून ३० हजार रुपये किमतीचे देशी बनावटीचे मॅगझीन असलेले स्टील धातूचे एक पिस्टल व तीन हजार रुपये किमतीची तीन पितळी जिवंत काडतुसे हस्तगत करण्यात आली. त्याचप्रमाणे आरोपी अश्‍विन सूर्यवंशी याच्याकडून १९ इंच लांबीची तलवार हस्तगत करण्यात आली.

आरोपी अरमानसिंग रंधवा याच्याकडून एक लाख २६ हजार रुपये किमतीचे सोन्याचे दागिने हस्तगत करण्यात आले. यासह विविध गुन्ह्यांतील आरोपी, हिस्ट्रीशिटर आणि तडीपार आदी आरोपींची माहिती घेऊन त्यांच्यावर कारवाई करण्यात आल्याची माहिती वरिष्ठ पोलिस निरीक्षक राजेंद्र कदम यांनी दिली.