Mira Bhayandar: मिरा-भाईंदर वसई-विरार पोलिसांच्या गुन्हे शाखेतील सहायक पोलिस निरीक्षकाने आरोपीला जामीन मिळवून देण्यासाठी १० लाखांची मागणी केल्याप्रकरणी काशी-मिरा पोलिस ठाण्यात गुन्हा दाखल करण्यात आला आहे. याप्रकरणी अद्याप कोणालाही अटक करण्यात आलेली नाही.

विरार पोलिस ठाण्यात दाखल असलेल्या एका गुन्ह्यात आरोपीला जामीन मिळवून देण्यासाठी मदत करण्याच्या बदल्यात गुन्हे शाखा युनिट एकमध्ये कार्यरत असलेले सहायक पोलिस निरीक्षक कैलास टोकळे यांनी आरोपीच्या भावाकडे दहा लाख रुपयांची मागणी केली होती.

यासंदर्भात ठाणे लाचलुचपत प्रतिबंधक विभागाकडे तक्रार दाखल करण्यात आली. त्यानंतर या विभागाने तक्रारीची पडताळणी सुरू केली. १० लाखांपैकी पाच लाख रुपयांचा पहिला हप्ता टोकळे घेणार असल्याचे पडताळणीत स्पष्ट झाले. त्यामुळे त्याच्यावर भ्रष्टाचार प्रतिबंधक अधिनियमातील तरतुदीनुसार गुन्हा दाखल करण्यात आला.