Mumbai News: मोबाईल हरवल्यावरून घरात झालेल्या भांडणात महिलेचा जीव गेल्याची घटना ऐरोलीतील साईनाथ वाडीमध्ये गुरुवारी (ता. २८) घडली. (navi mumbai Crime)

रबाळे पोलिसांनी याप्रकरणी गुन्हा दाखल केला असून महिलेच्या दिराला ताब्यात घेतले आहे. यशोदा बैत्राम्नी (वय ३३) असे मृत महिलेचे नाव आहे. (marathi crime news)

यशोदा बैत्राम्नी ही महिला ऐरोलीतील साईनाथ वाडी येथे तिच्या कुटुंबासह राहत होती. काही दिवसांपूर्वी तिचा लहान दीर विष्णू बैत्राम्नी याने तिचा मोबाईल हरवला होता. त्यामुळे आपल्याला नवा मोबाईल घेऊन दे, असा तगादा यशोदा हिने विष्णूकडे लावला होता. गुरुवारी रात्री यशोदाने त्याच्याकडे नव्या मोबाईलबाबत विचारणा केली.

त्यामुळे दोघांत बाचाबाची झाली. त्यांची भांडणे सोडवण्यासाठी यशोदा हिचा मोठा दीर गोपाळ आणि त्याची पत्नी अंजली या दोघांनी मध्यस्थी करण्याचा प्रयत्न केला; पण विष्णू याने गोपाळला मारहाण करण्यास सुरुवात केली. त्यांचे भांडण सोडवण्याचा प्रयत्न अंजली व यशोदा या दोघींनी केला; पण विष्णूने त्या दोघींनाही ढकलून दिले.

यात यशोदाच्या डोक्याला जोराचा मार लागल्यामुळे ती बेशुद्ध झाली. तिला रुग्णालयात नेले असता डॉक्टरांनी तिल मृत घोषित केले. त्यामुळे विष्णूविरोधात गुन्हा दाखल झाला असून त्याला ताब्यात घेण्यात आले आहे.