मुंबई, ता. १ : वीजग्राहकांच्या मासिक बिलात पारदर्शकता व अचूकतेसाठी महावितरणने राज्यात स्मार्ट मीटर बसवण्यास सुरुवात केली आहे. त्यानुसार महावितरणची १८ कार्यालये आणि कर्मचारी निवासाच्या ३२३ सदनिकांमध्ये ३४१ स्मार्ट मीटर बसवण्यात आले आहेत.
वीजग्राहकांसाठी स्मार्ट मीटर बसवताना सर्वप्रथम महावितरणची कार्यालये आणि कर्मचाऱ्यांसाठी असलेल्या निवासस्थानांमध्ये स्मार्ट मीटर बसवण्याच्या सूचना महावितरणचे व्यवस्थापकीय संचालक लोकेश चंद्र यांनी केल्या होत्या. त्यानुसार नागपूर शहरात ६०, गोंदियामध्ये १४६, वर्धा येथे ३०, भंडारा येथे १० आणि चंद्रपूरमध्ये ९५ अशा एकूण ३४१ वीजग्राहकांसाठी स्मार्ट मीटर बसवण्यात आले आहेत. केंद्र शासनाकडून मिळणाऱ्या अनुदानाच्या आधारे राज्यात कृषी ग्राहक वगळता सर्व ग्राहकांच्या कार्यालये अथवा निवासस्थानी स्मार्ट मीटर बसवण्यात येणार आहेत. त्यासाठीचे सर्वेक्षण पूर्ण झाले असून आधुनिक डिजिटल तंत्रज्ञानावर आधारित मीटरमुळे विजेची अचूक नोंद होणार आहे.