BJP News: भाजपचे माजी मंत्री जगन्नाथ पाटील यांनी उपमुख्यमंत्री देवेंद्र फडणवीस यांना पत्राद्वारे भिवंडी लोकसभेचे उमेदवार कपिल पाटील यांना पराभूत करण्यासाठी आमदार किसन कथोरे यांनी प्रयत्न केल्यामुळे त्यांची पक्षातून हकालपट्टी करण्याची मागणी केली आहे. जगन्नाथ पाटील यांच्या पत्रामुळे ऐन लोकसभा निकालापूर्वी भाजपमधील अंतर्गत वाद चव्हाट्यावर आला आहे.

जगन्नाथ पाटील यांनी देवेंद्र फडणवीस यांना ३१ मे रोजी दिलेल्या पत्राच्या आशयात पक्षाचे अधिकृत उमेदवार कपिल पाटील यांना पराभूत करण्यासाठी मुरबाडचे भाजप आमदार किसन कथोरे यांनी त्यांच्या समर्थकांमार्फत प्रयत्न केले आहेत. त्यामुळे त्यांची पक्षातून हकालपट्टी करावी, असा उल्लेख करण्यात आला आहे.

चार-पाच महिन्यांपूर्वी उपमुख्यमंत्र्यांच्या सागर बंगल्यावर आपण स्वतः, रवींद्र चव्हाण, कपिल पाटील, किसन कथोरे यांच्यात बैठक झाल्याचे नमूद करण्यात आले आहे. त्यावेळी कपिल पाटील यांनी त्यांचे आक्षेप स्पष्टपणे मांडले; पण कथोरेंनी यावर कोणताही खुलासा केला नाही, असे पाटील यांनी पत्रात नमूद केले. सोबतच किसन कथोरे यांनी कपिल पाटील यांना पराभूत करण्यासाठी त्यांच्या जवळच्या कार्यकर्त्यांना आगरी समाजाची गावे आहेत, अशा ठिकाणी तुतारीला मतदान करा आणि जेथे कुणबी समाजाची गावे आहेत तेथे नीलेश सांबरे या अपक्ष उमेदवाराला मतदान करण्याची सक्त ताकीद केल्याचा आरोप केला.

कथोरे यांच्याविरोधात पक्षाच्या कार्यकर्त्यांमध्ये असंतोष निर्माण झाला असून प्रचंड खदखद आपल्या निदर्शनात आल्याचे जगन्नाथ पाटील यांनी म्हटले आहे. त्यामुळे किसन कथोरे यांची पक्षातून हकालपट्टी करावी, अशी विनंती उपमुख्यमंत्री देवेंद्र फडणवीस यांच्याकडे जगन्नाथ पाटील यांनी केली आहे.