सकाळ वृत्तसेवा
ठाणे, ता. २१ : जिल्ह्यातील ग्रामीण भागात जलजीवन मिशनअंतर्गत पाणीपुरवठा योजनेची कामे हाती घेण्यात आली आहे. या कामांची अनेकदा देखभाल दुरुस्तीअभावी दुरवस्था होते. ही बाब लक्षात घेत कामांच्या देखभाल व दुरुस्तीसाठी प्रत्येक ग्रामपंचायतीत गवंडी, प्लंबर, मेकॅनिक, फिटर व इलेक्ट्रिशियन, पंप ऑपरेटर याप्रमाणे तीन नल जलमित्रांची नेमणूक करण्यात येणार आहे. त्यामुळे कौशल्य असलेल्या तरुणाला गावातल्या गावातच रोजगार उपलब्ध होणार आहे.

ठाणे जिल्ह्यातील कल्याण, मुरबाड, अंबरनाथ, भिवंडी आणि शहापूर या तालुक्यांत जलजीवन मिशनअंतर्गत पाणीपुरवठ्याची कामे हाती घेतली आहेत. ही कामे पूर्ण केल्यानंतर त्यांची देखभाल दुरुस्तीअभावी दुरवस्था होत असते. त्यामुळे अनेक योजना बंददेखील पडत असल्याने जलजीवन मिशन या योजनेलाच गळती लागत असल्याचे दिसून येते. याची दाखल घेत जलजीवन मिशनअंतर्गत येणाऱ्या पाणीपुरवठ्याच्या कामांच्या देखभाल दुरुस्तीसाठी नल जलमित्रांची नियुक्ती करण्यात येणार आहे. त्यानुसार ठाणे जिल्ह्यातील प्रत्येक ग्रामपंचायतीअंतर्गत तीन नल जलमित्रांची निवड करण्यात येणार आहे.

प्लंबर, गवंडी, मोटर मेकॅनिक, फिटर, इलेक्ट्रिशियन, पंप ऑपरेटर या तीन पदांसाठी प्रत्येक पदासाठी तीन याप्रमाणे नऊ उमेदवारांची नामनिर्देशने राज्यस्तरावर करण्यासाठी ग्रामपंचायतीअंतर्गत माहिती ॲपद्वारे भरायची आहे. ग्रामपंचायतींमार्फत सादर केलेल्या नामनिर्देशनामधून राज्यस्तरावरून उमेदवारांची निवड करण्यात येणार आहे. निवड झालेल्या नल जलमित्रांना प्रशिक्षण देण्यात येणार आहे. या ट्रेडसाठी गावातील अनुभव असलेल्या व उचित पात्रता धारण करणाऱ्या उमेदवारास प्राधान्य देण्यात येणार आहे.

कौशल्य असलेल्या उमेदवाराला गावातच रोजगार उपलब्ध होणार आहे. पाणीपुरवठा योजनांची देखभाल दुरुस्ती व शाश्वततेसाठी ग्रामपंचायत स्तरावर तांत्रिक मनुष्यबळ उपलब्ध करून देण्यात येणार आहे. यासाठी पात्र उमेदवारांनी ग्रामपंचायतीकडे संपर्क साधावा.
- रोहन घुगे, मुख्य कार्यकारी अधिकारी