उल्हासनगर स्थानकाच्या फलाटाच्या उंचीत वाढ
उल्हासनगर, ता. ६ (बातमीदार) : येणाऱ्या व थांबणाऱ्या लोकल आणि प्लॅटफॉर्म यातील अंतरामुळे प्रवाशांच्या जीवाला सतत धोका निर्माण होत होता. लोकलमध्ये चढताना किंवा उतरताना प्रवासी पडून किरकोळ जखमी झाल्याच्या घटनाही घडत होत्या; मात्र आता प्लॅटफॉर्मची उंची वाढवल्याने अपघाताचे संकट टळले आहे. फलाट क्रमांक दोनवरून मुंबईच्या दिशेने लोकल जातात. खोपोली, कर्जत, बदलापूर, अंबरनाथ येथून मुंबईसाठी जाणाऱ्या लोकल याच प्लॅटफॉर्मवर थांबतात; मात्र लोकल व प्लॅटफॉर्म यादरम्यान मोठा गॅप असल्याने एक महिला लोकलमध्ये चढताना जखमी झाल्याची माहिती ॲड. प्रशांत चंदनशिवे यांना मिळाली होती. चंदनशिवे यांनी स्टेशन प्रबंधक सबिता नित्यानंद यांची भेट घेऊन प्लॅटफॉर्म व लोकलमधील अंतराबाबत निवेदनाद्वारे लक्ष वेधले. प्लॅटफॉर्मची उंची वाढवण्यासाठी २५ फेब्रुवारीला सकाळी उपोषणाचा इशारा दिला होता. दुसरीकडे युवासेना अधिकारी सुशील पवार यांनीही पाठपुरावा करून खासदार डॉ. श्रीकांत शिंदे यांना धोकादायक प्लॅटफॉर्मची माहिती दिली. चंदनशिवे, पवार यांनी रेल्वेमंत्री, मुख्यमंत्री, रेल्वेचे डीआरएम यांना ट्विट केले होते. आता उंचीचे काम पूर्ण झाल्याने आता प्रवासी चढताना- उतरताना जखमी होण्याच्या घटना टळू लागल्याची माहिती समाजसेवक प्रशांत चंदनशिवे, युवासेना अधिकारी सुशील पवार यांनी दिली.