रिक्षाचालकांच्या विरोधात गांधीगिरी
ठाणे शहर, ता. ८ (बातमीदार) : घोडबंदर येथील रहिवाशांनी रिक्षाचालकांच्या मनमानी वागणुकीविरोधात गांधीगिरी आंदोलन केले. शालेय विद्यार्थी आणि त्यांच्या पालकांना जवळचे भाडे नाकारणाऱ्या रिक्षाचालकांना पुष्पगुच्छ देऊन त्यांना त्यांच्या कर्तव्याची जाणीव करून दिली. विद्यार्थ्यांनी हात दाखवताच रिक्षा थांबवून त्यांना शाळेत-घरी नेऊन सोडा, अन्यथा कायद्याचा आणि लोकांच्या रोषाचा सामना करावा लागेल, असा इशाराही दिला.

घोडबंदर येथील वाहतूक कोंडीचा फटका शालेय विद्यार्थी आणि त्यांच्या पालकांना मोठ्या प्रमाणात बसू लागला आहे. त्यातच अनेकदा या मार्गावरील रिक्षाचालक जवळचे भाडे नाकारत असल्याने अनेक विद्यार्थ्यांना आणि त्यांच्या पालकांना शाळेत पोहोचायला उशीर होतो. बहुतांश रिक्षाचालकांना ठाणे स्थानक, तीन हात नाक, मुलुंड टोल नाका अथवा इतर ठिकाणचे लांबचे भाडे पाहिजे असते. त्यामुळे शाळा, महाविद्यालयात जाण्याची घाई असतानाही रिक्षावाल्यांकडून जवळचे भाडे नाकारले जाते. त्यामुळे त्यांना शाळेत वेळेत पोहोचता येत नाही. त्यामुळे अशा रिक्षाचालकांचा जस्टीस फॉर घोडबंदर रोड ग्रुपने सोमवारी (ता. ७) पुष्प गुच्छ देऊन त्यांना असे न करण्याची विनंती केली. येथील न्यू होरीझॉन शाळा आणि इतर परिसरात पालक आणि जस्टीस फॉर घोडबंदर रोड ग्रुपचे सदस्य उभे राहून जवळचे भाडे नाकारणाऱ्या रिक्षाचालकाला पुष्पगुच्छ देऊन त्यांना प्रवाशांबद्दलच्या नियम आणि कर्तव्याची जाणीव करून देत होते. सुरुवातीला गांधीगिरीने समजावत आहोत, ऐकले नाही तर वाहतूक पोलिस, प्रादेशिक परिवहन पोलिस यांच्याकडे तक्रारी करू, तरीही असे वागणे थांबत नसेल, तर मग जनता तिच्या पद्धतीने धडा शिकवेल, असा इशारा या ग्रुपसदस्य गिरीश पाटील आणि इतरांनी दिला.