तुर्भे, ता. १ (बातमीदार) : मुंबई कृषी उत्पन्न बाजार समितीने सेक्टर १९ मध्ये मालाची साठवणूक करण्यासाठी शीतगृह बांधले होते; मात्र शीतगृह भाड्याने देण्यास अनेक तांत्रिक अडचणी येते होत्या. डिसेंबर २०२३ मध्ये संचालक मंडळाने हे शीतगृह भाड्याने देण्याचा निर्णय घेतला होता; मात्र तो अमलात आणण्यासाठी तब्बल १४ महिने लागले आहेत. आता शीतगृहाचे महिन्याला १३ लाख ५० हजार ९९९ भाडे एपीएमसीच्या तिजोरीत जमा होत आहेत.
मुंबई कृषी उत्पन्न बाजार समितीत हजारो शेतकरी आपला शेतमाल विक्रीसाठी आणतात. व्यापारी हा शेतमाल खरेदी करून त्याची दुबार विक्रीद्वारे मुंबई आणि उपनगरात वितरित करतात. बराच शेतमाल, सुका मेवा निर्यात केला जातो; मात्र अशा मालाची साठवणूक करण्यास शीतगृहाची गरज लागते. म्हणून येथील व्यापारी खासगी शीतगृहाचा आसरा घेत होते. व्यापाऱ्यांच्या सोयीसाठी बाजार समितीने सेक्टर १९, भूखंड क्रमांक दोनवर ३० कोटी रुपये खर्च करून २०१८ मध्ये ३,७०० मेट्रिक टन क्षमतेचे शीतगृह बांधले. हे शीतगृह बांधून तयार असले तरी भोगवटा प्रमाणपत्राअभावी ते सुरू करण्यात आले नव्हते. शीतगृहाच्या इमारतीस २०२३ मध्ये भोगवटा प्रमाणपत्र मिळाले. त्यानंतर सल्लागार मे. न्युट्रिस प्रोजेक्ट इंजिनियर्स, कन्सल्टन्स यांनी सादर केलेल्या मूल्यांकनानुसार बाजार समितीने शीतगृह भाड्याने देण्याचा निर्णय घेतला होता आणि फेब्रुवारीमध्ये सत्यराज कोल्ड फ्रेश यांनी ते भाड्याने घेतले. त्यामुळे शीतगृहाच्या भाड्यापोटी एपीएमसीला दरमहा १३ लाख ५० हजार ९९९ रुपयांचे उत्पन्न मिळत असल्‍याची माहिती एपीएमसीतील अभियंत्यांनी दिली. शीतगृह सुरू झाल्याने शेतमाल निर्यात करणाऱ्या व्यापारी तसेच शेतकऱ्यांना दिलासा मिळाला आहे.

खासगी शीतगृहांच्या मनमानीला चाप?
नवी मुंबई, वाशीतील एपीएमसी आवारात शीतगृह नसल्याने बाजारालगत काही बाहेरील व्यापाऱ्यांनी शीतगृहे उभारली होती. त्यातील अनेक शीतगृहे अनधिकृत आहेत आणि या शीतगृहांत काही व्यापारी फळांची साठवून करण्याच्या नावाखाली विनापरवाना थेट विक्री करतात. तसेच शेतकऱ्यांकडून अधिक भाडे आकारले जायचे; मात्र आता बाजार समितीचे शीतगृह सुरू झाल्याने अनधिकृत शीतगृहांना चाप बसेल.