सकाळ वृत्तसेवा
ठाणे, ता. २ : महापालिका क्षेत्रातील नाले, गटारांमधील पाणी वस्त्यांमध्ये शिरल्याने जनजीवन विस्कळित होते. ही बाब लक्षात घेऊन ठाणे पालिका क्षेत्रातील प्रमुख आठ नाल्यांवर सेन्सरमुळे नाल्यातील पाण्याची पातळी समजणार असल्याने पूरमुक्त ठाणे ठेवण्यास मदत होणार आहे.
दरवर्षीच्या तुलनेत यंदा पावसाने लवकर हजेरी लावल्याने ठाणे महापालिकेचा आपत्ती व्यवस्थापन विभाग सज्ज झाला आहे. शहरातील नालेसफाईची कामे जलदगतीने पूर्ण करण्याची तयारी एकीकडे सुरू आहे. तर दुसरीकडे पावसाळ्यात नाले, गटारे तुंबून त्याचे पाणी रस्त्यावर जनजीवन विस्कळित होऊ नये, यासाठी पालिका प्रशासनाने उपाययोजना करण्यास सुरुवात केली आहे. याच अनुषंगाने शहरातील दरवर्षी पाणी साचणाऱ्या नाल्यांवर पाणी खेचण्यासाठी पंप बसवण्याची मोहीम हाती घेतली आहे. त्याचबरोबर वृदांवन, ठाणे कॉलेज, साकेत, मुंब्रा स्मशानभूमी नाला, गायमुख, हिरानंदानी इस्टेट आणि आणखी दोन नाल्यांवर सेन्सर लावण्यात येणार आहेत. यामुळे नाल्यातील पाण्याची पातळी तसेच धोकादायक परिस्थितीचा अंदाज सेन्सरच्या माध्यमातून दिली जाणार आहे. तसेच महापालिका मुख्यालयाच्या ठिकाणी आपत्ती व्यवस्थापन कक्षाबरोबर नऊ प्रभाग समितीत आपत्ती व्यवस्थापन कक्ष कार्यान्वित केले आहेत. या ठिकाणी प्रत्येकी दोन ते तीन कर्मचाऱ्यांवर प्रभाग समितीनिहाय तक्रारी सोडवण्याची जबाबदारी आहे.
--------------------------------------------
पाणी साचल्यास तत्काळ वर्दी
महापालिकेने शहरातील नाल्यांमधील पाणी पातळीची नोंद ठेवण्यासाठी एक सुरक्षा चौकी उभारली आहे. या ठिकाणी तीन शिफ्टमध्ये कर्मचारी तैनात असणार आहेत. त्याच्या माध्यमातून पंप सुरू आहेत किंवा बंद पडले आहेत, याची चाचपणी केली जात आहे. तसेच स्थानिक नागरिकांचा सहभाग वाढवण्यासाठी मोबाइल क्रमांक घेतले असून, महापालिकेच्या व्हॉट्सॲप ग्रुपवर जोडण्यात आले आहेत. त्यानुसार पाणी साचण्याच्या ठिकाणी कर्मचारी नसला, पंप बंद पडला किंवा पाणी साचल्यास त्याची वर्दी आता स्थानिकांना या माध्यमातून देता येणार आहे.
.......................
९४ शाळांत तात्पुरता आसरा
नऊ प्रभाग समितीअंतर्गत ९४ शाळांमध्ये पावसाळ्यात एखाद्या वेळेस काही हानी झाल्यास, इमारत रिकामी करावी लागल्यास अशा लोकांना तात्पुरत्या स्वरूपात शाळांमध्ये ठेवण्याची व्यवस्था करण्यात आली आहे.