मनोर, ता. ५ (बातमीदार) : मुंबई-अहमदाबाद महामार्गावरील चिल्हार गावातील नवजीवन हॉटेलसमोर गुजरात वाहिनीवर रस्ता ओलांडताना अज्ञात वाहनाने दिलेल्या धडकेत पादचारी जागीच ठार झाला. प्रदीप बडतरे (वय ३०, रा. दादडे, ता. विक्रमगड) असे त्याचे नाव होते. सोमवारी रात्री झालेल्या या अपघाताची माहिती मिळताच मनोर पोलिस ठाण्याचे कर्मचारी घटनास्थळी दाखल झाले होते. पंचनामा करून मृतदेह ताब्यात घेत मनोरच्या ग्रामीण रुग्णालयात नेण्यात आला. शवविच्छेदनानंतर शासकीय सोपस्कार पार पाडून मृतदेह कुटुंबीयांच्या ताब्यात देण्यात आला. अपघाताची माहिती न देता पळून गेल्याप्रकरणी वाहनचालकाविरोधात मनोर पोलिस ठाण्यात गुन्हा दाखल करण्यात आला आहे.