विरार (बातमीदार) : वसई तालुक्याची लोकसंख्या जवळपास ३० लाखांच्या आसपास आहे. त्यानुसार या भागात जवळपास आठ हजारपेक्षा जास्त गृहनिर्माण संस्था, १५ पतपेढ्या, तीन नागरी सहकारी बँका, १९ सेवा संस्था व एक बाजार समिती आहेत; परंतु वसई तालुक्यात एकच उपनिबंधक कार्यालय असल्यामुळे नागरिकांना विविध कामांसाठी अथवा तक्रारींचे निवारण करण्यासाठी वसई येथील उपनिबंधक कार्यालयात अनेकदा हेलपाटे मारावे लागतात. यामुळे नागरिकांची वेळ व पैसे दोन्ही खर्च होतात. नागरिकांना होणारी गैरसोय दूर व्हावी म्हणून वसई येथील उपनिबंधक कार्यालयाचे विभाजन करून नालासोपारा अथवा विरार येथे एक नवीन उपनिबंधक कार्यालय सुरू करण्यात यावे, अशी मागणी आमदार राजन नाईक यांनी सहकार राज्यमंत्री पंकज भोयर यांची भेट घेऊन लेखी निवेदनाद्वारे मागणी केली आहे. या निवेदनाची दखल घेत त्यांनी सहकार विभागाचे प्रधान सचिव यांना प्रस्ताव सादर करण्याचे आदेश दिले आहेत. त्यामुळे नाईक यांनी मंत्री भोयर यांचे आभार मानले. या भेटीदरम्यान जिल्हाध्यक्षा प्रज्ञा पाटील आणि माजी जिल्हाध्यक्ष महेंद्र पाटील उपस्थित होते.