जुईनगर, ता. २१ (बातमीदार) : नवी मुंबई महापालिकेकडून एपीएमसीतल्या मसाला बाजारामधील मध्यवर्ती सुविधा इमारतीचा पाणीपुरवठा व महावितरणकडून वीजपुरवठा बुधवारपासून (ता. १८) खंडित करण्यात आला आहे. इमारत अतिधोदायक असल्याने पालिकेने ही कारवाई केली. पाणी व वीज दोन्ही अत्यावश्यक सुविधा बंद झाल्याने त्वरित गुरुवारी (ता. १९) संबंधित व्यापाऱ्यांची तातडीची बैठक पार पडली. बैठकीत इमारतीच्या पुनर्बांधणीचा प्रस्ताव सर्वानुमते मान्य करण्यात आला आहे. इमारतीतील तळमजला आणि २७२ कार्यालयधारकांपैकी बैठकीला १८०हून अधिक कार्यालयाधारक उपस्थित होते.
मुंबई कृषी उत्पन्न बाजार समितीमधील प्रत्येक बाजाराला तत्सम कार्यासाठी मध्यवर्ती इमारती बांधण्यात आल्या आहेत. या ठिकाणी बाजार समितीमधील कामकाजाची एकूण २७२ कार्यालये आहेत. गेल्या काही वर्षांपासून इमारत पुनर्विकासाठी संचालक मंडळ व प्रशासनातर्फे प्रकल्प व्यवस्थापन सल्लागार (पीएमसी) नेमण्यात आले होते; मात्र संबंधित व्यावसायिक आणि विकसकामधील व्यवहारिक देवाण-घेवाण पूर्णत्वास जात नसल्याने इमारतीचा पुनर्विकास रखडला होता. यावर झालेल्या बैठकीत मार्ग निघाल्याने लवकरच या इमारतीचा पुनर्विकासाला चालना मिळणार आहे. इमारत डागडुजी करण्याच्या स्थितीत राहिली नाही. त्यामुळे सर्वानुमते पुनर्बांधणीचा निर्णय घेतला. नेमलेल्या पीएमसीच्या अहवालानुसार प्रत्येक गाळाधारकाला १०० चौरस फूट अधिक जागा आणि प्रत्येकाला वाहन पार्किंग निश्चित केली आहे. त्यानुसार इमारत पुनर्बांधणी निश्चित झाली आहे, अशी माहिती मसाला बाजारातील मुडी बाजार असोसिएशनच्या उत्तम भणगे यांनी दिली.