जलवाहिनी फुटल्याने हजारो लिटर पाणी वाया
कल्याण पश्चिमेत पुरवठ्यावर परिणाम; नागरिकांचा संताप
सकाळ वृत्तसेवा
डोंबिवली, ता. २३ : कल्याण पश्चिमेतील खडकपाडा परिसरात रविवारी (ता. २२) पहाटेच्या सुमारास ७०० मिमी व्यासाची जलवाहिनी फुटून हजारो लिटर पाणी वाया गेले. शहरात सीसीटीव्ही कॅमेरे उभारणीचे काम सुरू आहे. या कामाचे खोदकाम सुरू असताना जेसीबीचा धक्का लागल्याने जलवाहिनी फुटली. पालिकेच्या पाणीपुरवठा विभागाला याची माहिती मिळताच तातडीने वाहिनीचा पाणीपुरवठा बंद करत दुरुस्तीचे काम हाती घेण्यात आले. यामुळे पश्चिमेतील ब आणि क प्रभागातील नागरिकांना पाणीपुरवठा होऊ शकला नाही. चार तासांच्या अथक प्रयत्नानंतर दुरुस्तीचे काम पूर्ण झाले, त्यानंतर पाणीपुरवठा सुरळीत सुरू करण्यात आला.

कल्याण आणि डोंबिवली शहरांच्या विविध भागात मुख्य वर्दळीच्या रस्त्यांवर सरकारच्या निर्देशाप्रमाणे गृह विभागाकडून सीसीटीव्ही कॅमेरे बसविण्याची कामे सुरू आहेत. महापालिका आणि गृह विभागाच्या समन्वयातून ही कामे सुरू आहेत. कल्याण पश्चिमेतील खडकपाडा भागात शनिवारी (ता. २१) रात्री सीसीटीव्ही कॅमेऱ्यांचे खांब उभारणीसाठी जेसीबीच्या सहाय्याने खोदकाम सुरू होते. हे खोदकाम करताना रविवारी पहाटे साडेपाचच्या सुमारास जेसीबीचालकाच्या भूमिगत जलवाहिनी निदर्शनास आली नाही. त्यामुळे जलवाहिनी फुटताच जलवाहिनीतील अतिदाबाने पाण्याचे उंच उंच वेगाने फवारे उडू लागले. पालिका, गृह विभागातील अधिकाऱ्यांनी समन्वयाने ही कामे करावीत, असे निर्देश आहेत. तरीही गृह विभाग व त्यांच्या ठेकेदाराकडून पालिका अधिकाऱ्यांना विश्वासात न घेताच खोदकामे केली जात आहेत, त्यामधून हा प्रकार घडल्याचे पालिका अधिकाऱ्यांचे म्हणणे आहे.

बारावे जलशुद्धीकरण केंद्रातून आलेल्या या जलवाहिनीतून खडकपाडा परिसर, लालचौकी, आधारवाडी परिसराला पाणीपुरवठा केला जातो. पहाटेच्या सुमारास जलवाहिनी फुटल्याने कल्याण पश्चिमेत सकाळी पाणीपुरवठ्यावर परिणाम झाला आहे. जलवाहिनी फुटल्याची माहिती मिळताच आयुक्त अभिनव गोयल यांच्या निर्देशावरून कल्याण-डोंबिवली पालिकेच्या जल अभियंता अनिता परदेशी, पाणीपुरवठा विभागाचे कार्यकारी अभियंता अशोक घोडे यांच्या मार्गदर्शनाखाली बारावे येथील या जलवाहिनीवरून होणारा पाणीपुरवठा काही वेळ बंद करून जलवाहिनी दुरुस्तीचे काम हाती घेण्यात आले. चार तासांत दुरुस्तीचे काम पूर्ण करून नंतर पाणीपुरवठा सुरू केला, अशी माहिती पाणीपुरवठा विभागाने दिली. रविवारी ऐन सुट्टीच्या दिवशी सकाळी घरात पाणी न आल्याने नागरिकांमध्ये नाराजीचे वातावरण होते.

गृह विभागाकडून खडकपाडा भागात सीसीटीव्ही उभारणीसाठी खोदकाम करताना पालिकेची भूमिगत जलवाहिनी फुटली. या वाहिनीवरील पाणीपुरवठा काही वेळ बंद करून तातडीने जलवाहिनी दुरुस्तीचे काम हाती घेतले. हे काम काही तासात पूर्ण करून पश्चिमेचा पाणीपुरवठा सुरळीत करण्यात आला आहे.
- अनिता परदेशी, जल अभियंता, कडोंमपा.