कल्याणकरांचा जीव टांगणीला
रेल्वेस्थानकात जाण्यासाठी लोकलच्या डब्यातून प्रवास

डोंबिवली, ता. २२ : रेल्वेस्थानकात एका फलाटावरून दुसऱ्या फलाटावर जाण्यासाठी, तसेच स्थानकाबाहेर पडण्यासाठी शॉर्टकट म्हणून अनेकदा प्रवासी रेल्वे रूळ ओलांडतात; मात्र कल्याणमध्ये चक्क लोकलचा डबा ओलांडून प्रवासी रेल्वेस्थानक गाठत असल्याचे वेगळेच चित्र पाहायला मिळते. कल्याण येथे लोकग्राम पादचारी पूल पाडल्यानंतर प्रवाशांना रेल्वे रूळ ओलांडून स्थानक गाठावे लागते; मात्र या रुळावर यार्डातील लोकल उभी राहत असल्याने प्रवाशांना अनेक अडचणी येत होत्या. त्या कमी करण्यासाठी लोकलच्या डब्याला लागून मचाणची बांधणी केली आहे. यामुळे प्रवासी आता लोकलचा डबा ओलांडून प्रवास करताना दिसत आहेत.

कल्याण पूर्वेला लोकग्राम चक्कीनाका, जिम्मी बाग, हाजी मलंगपट्ट्यात राहणाऱ्या नागरिकांना कल्याण रेल्वेस्थानकात येण्यासाठी लोकग्राम पादचारी पूल हा सोयीचा आहे. कल्याण पूर्वेला जाण्यासाठी मुंबई दिशेकडील हा एकमेव पूल आहे. हा पूल धोकादायक झाल्याने दुरुस्तीसाठी तो पाडण्यात आला असून त्याची नव्याने उभारणी केली जात आहे. या पुलाचे काम सुरू असल्याने या भागातील नागरिकांना रेल्वेस्थानक गाठायचे असेल तर आता रेल्वे रूळ ओलांडून प्रवास करावा लागत आहे.

लोकग्रामचा पूल पाडल्यानंतर प्रवाशांनी कर्जत दिशेकडील स्कायवॉकचा वापर करावा, असे आवाहन रेल्वे प्रशासनाने प्रवाशांना केले आहे; मात्र दीड किमीचा वळसा प्रवाशांना पडत असल्याने ते रेल्वे रूळ ओलांडून जाणे पसंत करतात. येथे रेल्वे यार्डाची जागा असून अनेकदा सायडिंगला काढलेल्या लोकल या भागात उभ्या असतात. या लोकल उभ्या राहिल्या की मग प्रवाशांना लोकलला पूर्ण वळसा घालून जावे लागते. काही प्रवासी लोकलच्या डब्यांच्या खालून प्रवास करतात, काही प्रवासी लोकल डब्यात वर चढून अलीकडे पलीकडे जातात; मात्र हा प्रकार प्रवाशांच्या जीवावर बेतू शकतो. त्यामुळे यावर उपाय म्हणून प्रशासनाने येथे मचाण बांधून पायऱ्यांची सोय करण्यात आली आहे. जेणेकरून येथे लोकल उभी असल्यास या पायऱ्यांचा वापर करून प्रवाशांना डब्यातून पलीकडे ये-जा करणे सोपे होईल. याचा एक व्हिडिओ समाजमाध्यमातून चांगलाच व्हायरल होत आहे. अनेक नागरिकांनी त्यावर रीलदेखील बनविले आहेत.

अपघाताची भीती
दररोज दुपारी एक ते दुसऱ्या दिवशी सकाळी सहा वाजेपर्यंत १५ डब्यांची लोकल उभी केलेली असते. या लोकलमुळे लोकग्राम परिसरातून येणारे प्रवासी लोकल डब्याच्या खाली वाकून किंवा लोकल डब्यात चढून पलीकडे जातात. सकाळी सहाच्या दरम्यान ही लोकल डोंबिवलीला रवाना होते. डोंबिवलीतून सकाळी ६.१४ ची सीएसएमटीला जाणारी ही जलद लोकल आहे. डोंबिवली, मुंबईला जाणारे अनेक चाकरमानी या लोकलमधून सकाळी प्रवास करतात. दुपारी एक वाजता यार्डात ही लोकल दाखल होते. यामुळे सायंकाळच्या वेळी स्थानकातून बाहेर पडणाऱ्या प्रवाशांना येथून प्रवास करणे जिकिरीचे होते. त्यांच्या सोयीसाठी येथे मचाण व पायऱ्या बांधण्यात आल्या आहेत. प्रवासी त्याचा वापर करतात.
सकाळी सहानंतर गर्दीच्या वेळी ही लोकल येथे उभी नसल्याने प्रवाशांना पायऱ्या वापराव्या लागत नाहीत, ते रेल्वे रूळ ओलांडून प्रवास करतात.