खारघर, ता. २३ (बातमीदार) : निसर्गरम्य शहर म्हणून ओळखल्या जाणाऱ्या खारघर शहराला सध्या रंगीत फुलांचा साज चढला आहे. उत्सव चौकाकडून टाटा हॉस्पिटलकडे जाणाऱ्या रस्त्याच्या दुभाजकात पालिकेकडून लावण्यात आलेली विविध फुलांची झाडे बहरली आहेत. त्यामुळे रहिवाशांसह वाहनचालकांना या रंगीबेरंगी फुलांचे आकर्षण वाटत आहे.
खारघर परिसरात एकूण ४० सेक्टरचा समावेश आहे. सिडकोने खारघर शहर विकसित करताना रस्त्याच्या दुभाजकात पाम झाडांची लागवड करून रस्ते सुशोभित केले होते. पनवेल महापालिका अस्तित्वात आल्यानंतर हस्तांतरण प्रक्रिया सुरू झाल्यामुळे पालिका आणि सिडकोकडून उत्सव चौक परिसरातील हिरवळीकडे दुर्लक्ष झाल्यामुळे उन्हामुळे दुभाजकातील झाडे सुकून गेली होती. दरम्यान, पालिकेने खारघर शहराच्या सौंदर्यात तसेच पर्यावरणात भर पाडावी हा उद्देश समोर ठेवून डिसेंबर महिन्यात खारघरमधील रस्ते दुभाजकांच्या सुशोभीकरणाचे काम हाती घेऊन दुभाजकांत रंगीबेरंगी फुलांच्या रोपांची लागवड केली होती. याची चांगली जपणूक केल्यामुळे दुभाजकातील झाडे विविध रंगीबेरंगी फुलांनी बहरली असून, रस्ते फुलझाडांनी सजून गेले आहेत.
---------------
कामोठे, कळंबोलीतीलही दुभाजक बहरणार
दुभाजकांच्या सुशोभीकरण कामासाठी पालिकेने एका एजन्सीची तीन वर्षांसाठी नेमणूक केली आहे. दुभाजकात विविध फुलांची झाडे लावून देखभाल-दुरुस्तीचे काम देण्यात आले आहे. या कामासाठी पालिका एक कोटी रुपये खर्च करणार असल्याचे समजले. दुभाजकात रंगीबेरंगी फुलांच्या रोपांची लागवड केली जाणार असल्यामुळे पर्यावरण तसेच शहराच्या सौंदर्यात भर पडणार आहे. पालिकेने खारघर, कामोठे, कळंबोली आणि पनवेल वसाहतीमधील रस्त्यांच्या दुभाजकांच्या सुशोभीकरणाचे काम एका एजन्सीला दिले आहे. या कामासाठी पालिकेकडून तीन कोटी ८५ लाख ६१ हजार रुपये खर्च करणार आहे.
------------------
खारघरमध्ये हिरानंदानी, सीबीडी सेक्टर पाच आणि तळोजा शीघ्र कृती दलाकडून खारघरमध्ये प्रवेश करणारे मुख्य चौपदरी रस्ते आहेत. विशेष म्हणजे उत्सव चौकात काही सिनेमा तसेच विविध जाहिरातींचे चित्रीकरण केले जाते. दुभाजकातील विविध रंगीबेरंगी फुलांमुळे शहराच्या सौंदर्यात भर पडत आहे.
- दीपक शिंदे, शिक्षक, खारघर
-----------------
आयुक्तांच्या सूचनेनुसार खारघरमधील दुभाजक सुशोभीकरणाचे काम हाती घेण्यात आले आहे. खारघर परिसरातील दुभाजकात या पावसाळ्यात रोपांची लागवड करून त्यांचे सुशोभीकरण केले जाणार आहे.
- वैभव विधाते, उपायुक्त, पनवेल महापालिका
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.