माहुलच्या ३३० घरांचे वाटप रेंगाळले
किंमत वसूल न झाल्याने ३० जूनपर्यंत मुदतवाढ
सकाळ वृत्तसेवा
मुंबई, ता. २४ ः माहुल येथील घरांच्या विक्रीसाठी मुंबई महापालिकेने कमी प्रतिसादामुळे काही निकषात बदल केले. शिवाय एक महिना मुदत वाढवली, तरीही ९,०९८ घरांपैकी फक्त ३३० घरांसाठी नोंदणी झाली. या घरांचे २१ जूनला वाटप केले जाणार होते, मात्र सुमारे ५० घरांचेच पैसे आल्याने या घरांचे वाटप लटकले आहे.
पालिकेने आता घरांचे पैसे भरण्याची मुदत ३० जूनपर्यंत वाढवली आहे. या मुदतीत घरांची किंमत भरावी लागणार आहे. सर्व ३३० घरांची किंमत भरल्यानंतर या घरांचे वाटप केले जाणार आहे.
माहुलमधील सदनिकांमध्ये प्रकल्पबाधित राहायला जात नसल्याने तब्बल १३ हजारांवर घरे रिक्त आहेत. ही घरे पालिका कर्मचाऱ्यांना १२ लाख ६० हजार रुपये किमतीत मालकी तत्त्वावर विक्री केली जात आहे. गेल्या १५ मार्चपासून एकूण ९०९८ घरांसाठी अर्ज भरण्यास सुरुवात झाली. १५ एप्रिलपर्यंत मुदत देण्यात आली होती. या कालावधीत फक्त २३१ अर्ज आले.
अल्प प्रतिसादामुळे १५ मेपर्यंत मुदत वाढवण्यात आली. शिवाय निकषातही शिथिलता देण्यात आली, मात्र दोन महिन्यांनंतरही फक्त ३३० अर्ज आले. या अर्जदारांनी अनामत रक्कम आणि नियमानुसार घराची प्रक्रिया केली. सोडत काढून २१ जून रोजी या घरांचे वाटप केली जाणार होते, मात्र ३३० पैकी सुमारे ५० कर्मचाऱ्यांनीच घरांची रक्कम जमा केली. अनामत रक्कम भरून नोंदणी केलेल्या उर्वरित कर्मचाऱ्यांची रक्कम भरली नसल्याने आता आठवडाभराची मुदत वाढवण्यात आली आहे.
आधी घरांना प्रतिसाद नाही, आता जे अर्ज आले, विक्रीसाठी अनामत रक्कम भरून नोंदणीही झाली, मात्र घरांची रक्कम दिलेल्या मुदतीत जमा होत नसल्याने माहुलच्या घरांच्या विक्रीसाठी पालिकेची डोकेदुखी वाढली आहे.

कर्मचाऱ्यांचा प्रतिसाद कमी
सुरुवातीला तृतीय व चतुर्थ श्रेणीतील कर्मचाऱ्यांना घरे विकत घेता येतील, अशी अट होती, मात्र अल्प प्रतिसादामुळे ही अट शिथिल केली. त्यामुळे क्लासवन अधिकारी सोडून इतर सर्व कर्मचारी अधिकाऱ्यांसाठी घर खरेदीसाठी संधी देण्यात आली. तसेच पालिका वसाहतीत राहणाऱ्यांनाही अर्ज करण्याचे आवाहन करण्यात आले. दोन महिन्यांची मुदत देण्यात आली. पूर्वीच्या अटी शिथिल करून या नव्याने सुधारित अटी लागू केल्या, मात्र तरीही प्रतिसाद मिळालेला नाही. ९,०९८ घरांपैकी ३३० घरांसाठीच नोंदणी झाली, मात्र घरांची किंमतही वेळेत न आल्याने माहुलच्या घरांचे करायचे काय, हा पेच पालिकेसमोर निर्माण झाला आहे.