अंबरनाथमध्ये अस्वच्छतेचे साम्राज्य
उबाठाचा आंदोलनाचा इशारा
अंबरनाथ, ता. २४ (बातमीदार) ः शहरात योग्यरितीने साफसफाई होत नसल्याने अस्वच्छतेचे साम्राज्य पसरले आहे, त्यामुळे रोगराई पसरण्याची भीती आहे. या पार्श्वभूमीवर शहरातील प्रत्येक भागात स्वच्छता करावी अन्यथा आंदोलन करण्याचा इशारा शिवसेना (उबाठा) गटातर्फे नगरपालिका प्रशासनाला देण्यात आला आहे.
अंबरनाथमध्ये जागोजागी कचऱ्याचे ढिगारे दिसत असून, काही भागात कचरा नियमित उचलला जात नाही. कचरा उचलण्यासाठी नियमित घंटागाड्याही येत नाहीत. त्यामुळे कचऱ्याचे साम्राज्य पसरलेले असून, रोगराई वाढण्याची भीती आहे. अस्वच्छतेमुळे डासांचा प्रादुर्भाव वाढला आहे, मोकाट श्वानांची संख्या बेसुमार वाढली असून, त्यामुळे नागरिकांना त्रासाला सामोरे जावे लागते आदी समस्यांसंदर्भात शिवसेना उबाठा गटातर्फे मंगळवारी (ता. २४) प्रशासनाला निवेदन दिले आहे. तसेच याबाबत त्वरित लक्ष घालून शहरवासीयांना दिलासा द्यावा अन्यथा आंदोलन करण्याचा इशारा ठाकरे गटाने दिला आहे. या वेळी शहरप्रमुख ॲड. संदीप पगारे तसेच महिला जिल्हा संघटक आणि माजी उपनगराध्यक्षा अंजली राऊत, महिला शहर संघटक सोनिया फरकाडे यांच्या शिष्टमंडळाने उपमुख्याधिकारी उमेश राऊत यांची भेट घेऊन शहरातील अस्वच्छतेकडे लक्ष देण्याची मागणी करणारे लेखी निवेदन दिले.