आझादनगरमध्ये महापालिकेची धडक कारवाई
अनधिकृत गाळ्यांवर जेसीबीच्या साहाय्याने तोडक कारवाई
उल्हासनगर, ता. २४ (वार्ताहर) : ‘बेकायदा बांधकाम कराल तर कारवाई होणारच’ या भूमिकेवर ठाम राहत उल्हासनगर महापालिकेच्या अतिक्रमण विभागाने आझादनगर परिसरातील तीन अनधिकृत गाळ्यांवर सोमवारी (ता. २३) कडक कारवाई केली. या गाळ्यांना महापालिकेच्या पथकाने जेसीबीच्या साहाय्याने जमीनदोस्त केले.
आझादनगरमधील आइस फॅक्टरी परिसरात एकूण दहा अनधिकृत गाळे उभारण्यात आले होते. या गाळ्यांविरोधात महापालिकेने संबंधितांना नोटिसा बजावल्या होत्या. यानंतर काही दिवसांपूर्वी महापालिकेने कारवाईचा बडगा उगारत सात गाळे पाडून टाकले होते, तर उर्वरित तीन गाळ्यांमध्ये सामान असल्यामुळे त्यांना रिकामे करण्यासाठी अवधी देण्यात आला होता; मात्र प्रशासनाने दिलेला कालावधी संपल्यानंतर सोमवारी आयुक्त मनीषा आव्हाळे यांच्या मार्गदर्शनाखाली प्रभाग समिती क्रमांक दोनचे साहाय्यक आयुक्त गणेश शिंपी यांच्या मार्गदर्शनाखाली अतिक्रमण विभागाच्या पथकाने कारवाई केली.
संबंधित गाळ्यांमधील मालमत्ता हटविण्यात आल्याने कोणताही अनुचित प्रकार घडला नाही. पोलिस बंदोबस्तात ही कारवाई शांततेत पार पडली. उल्हासनगर महापालिकेच्या या कारवाईमुळे आझादनगर परिसरात खळबळ उडाली असून, यामुळे इतर अनधिकृत बांधकामधारकांमध्येदेखील भीतीचे वातावरण पसरले आहे. स्थानिक प्रशासनाने यापुढेही अशा अनधिकृत बांधकामाविरोधात कठोर पावले उचलण्याचे संकेत दिले आहेत.