पालघरमध्ये दिव्यांगजनांच्या सक्षमीकरणासाठी ‘पर्पल फेअर २०२५’
पालघर, ता. २४ (बातमीदार) ः दिव्यांगजनांच्या सक्षमीकरणासाठी पर्पल फेअर २०२५ या उपक्रमाचे आयोजन शुक्रवारी (ता. २७) सकाळी १० ते सायंकाळी पाच वाजेदरम्यान जिल्हाधिकारी कार्यालयात करण्यात येणार आहे. हा कार्यक्रम अली यावर जंग राष्ट्रीय वाचा आणि श्रवण दिव्यांगजन संस्था, बांद्रा, जिल्हा परिषद पालघर समाजकल्याण विभाग यांच्या पुढाकाराने आणि भारत सरकारच्या सामाजिक न्याय व सक्षमीकरण मंत्रालयाच्या अधिपत्याखाली आयोजित होत आहे.
याचे आयोजन डॉ. सुमन कुमार, संचालक, अली यावर जंग संस्था यांच्या मार्गदर्शनाखाली होत असून जिल्हा प्रशासन, दिव्यांग कल्याण विभाग, सामाजिक कल्याण विभाग, जिल्हा परिषद समाजकल्याण विभाग, जिल्हा दिव्यांग पुनर्वसन केंद्र विरार, तसेच विविध स्वयंसेवी संस्था आणि विशेष शाळांचा या उपक्रमात सक्रिय सहभाग आहे.
पालघर जिल्ह्यात प्रथमच होत असलेल्या या उपक्रमात दिव्यांग उद्योजक व कलाकारांसाठी उत्पादन व कला प्रदर्शनाचे स्टॉल्स, दिव्यांग विद्यार्थ्यांसाठी ‘पर्पल स्पोर्ट्स’अंतर्गत क्रीडा स्पर्धा, सहाय्यक साधनांचे प्रत्यक्ष प्रात्यक्षिक व वाटप, तसेच सांस्कृतिक कार्यक्रम, रोजगार मेळावा आणि शासकीय योजनांची माहिती देणारे सेवा स्टॉल्स यांचा समावेश असेल. या कार्यक्रमाला पालघर लोकसभा मतदारसंघाचे खासदार, आमदार, दिव्यांग कल्याण विभागाचे वरिष्ठ अधिकारी, जिल्हाधिकारी, जिल्हा परिषदेचे मुख्य कार्यकारी अधिकारी, पोलिस अधीक्षक तसेच केंद्र व राज्य शासनाचे अधिकारी उपस्थित राहणार आहेत.