सकाळ वृत्तसेवा
ठाणे, ता. २४ : परिसराला मंगळवार रात्रीपासून पडणाऱ्या पावसाने चांगलेच झोडपले आहे. संततधार पडणाऱ्या पावसाने शहरातील अनेक भागांत पडझडीच्या विविध घटनांची नोंद झाली असून, कोणतीही जीवितहानी झाली नसली तरी ठाणेकर मात्र धास्तावले आहेत.
ठाणे परिसराला मंगळवारी रात्री पावसाने चांगलेच झोडपले. संततधार सुरू असलेल्या पावसाने शहरातील अनेक भागांत पडझडीच्या घटनांची नोंद झाली आहे. यात पोखरण रोड क्रमांक १, श्री स्वामी समर्थ मठाच्या समोरील फॉरेस्टची अंदाजे १५ फूट लांब व सहा फूट उंच असलेली संरक्षण भिंत मंगळवारी (ता. २४) सकाळी साडेआठच्या सुमारास पडली, तर दुसरी घटना पोखरण रोड क्रमांक २, गांधीनगर येथे घडली. या वेळी नाल्यालगतची संरक्षण भिंत कोसळली. मंगळवारी (ता. २४) दुपारी बाराच्या सुमारास या घटनेची माहिती आपत्ती व्यवस्थापन विभागाच्या कर्मचाऱ्यांना मिळाली होती. त्यानुसार वर्तकनगर प्रभाग समिती (सार्वजनिक बांधकाम विभाग) यांच्यामार्फत कार्यवाही करण्यात आल्याची माहिती ठाणे महापालिका आपत्ती व्यवस्थापन विभागाने दिली.
---------------------------------------
इमारतीचा सज्जा कोसळला
उथळसर नाका येथील आनंदधाम ए को-ऑ. हाउसिंग सोसायटीच्या टेरेसवरील सज्जाचा काही भाग मंगळवारी पहाटे साडेपाचच्या सुमारास पडला. तळ अधिक सात मजली अशा या इमारतीचे बांधकाम सुमारे २५ वर्षे जुने आहे. या वेळी सज्जाचा काही भाग अतिधोकादायक असल्याची माहिती स्थानिक माजी नगरसेवक सुधीर कोकाटे यांनी आपत्ती व्यवस्थापन कक्षाला दिली होती. त्यानुसार पालिकेचे पथक तातडीने घटनास्थळावर दाखल झाले होते.
--------------------------------------------
छतावरील पत्र्याची शेड हटवली
नौपाडा भास्कर कॉलनी येथील माँ भवानी इमारतीच्या छतावरील पत्र्याची शेड तुटलेली होती. या घटनेत कोणालाही दुखापत झाली नसल्याची माहिती आपत्ती व्यवस्थापन विभागाने दिली. तसेच घटनेचे गांभीर्य लक्षात घेऊन लटकत असलेली पत्र्याची शेड कापून बाजूला करण्यात आली असल्याची माहिती आपत्ती व्यवस्थापन कक्षाने दिली.