सकाळ वृत्तसेवा
ठाणे, ता. २४ : महाराष्ट्र राज्य वरिष्ठ अ‍ॅथलेटिक्स अजिंक्यपद स्पर्धेत ठाणे महापालिका प्रशिक्षण योजनेअंर्तगत सराव करणाऱ्या खेळाडूंनी ११ पदकांची लयलूट केली आहे. यामध्ये ६ सुवर्णपदकांसह तीन रौप्य आणि दोन कांस्यपदकांचा समावेश आहे. बालेवाडी येथे २१ ते २३ जून कालावधीत ही स्पर्धा पार झाली होती.
या स्पर्धेत निखिल ढाकेने ४०० मीटर रिलेमध्ये सुवर्णपदक, १०० मीटर रिलेमध्ये रौप्य तसेच २०० मीटरमध्ये कांस्यपदक जिंकले. श्रेष्ठा शेट्टीने लांब उडीमध्ये कांस्यपदक आणि रिलेमध्ये सुवर्णपदक जिंकले. अली शेखने रिलेमध्ये सुवर्णपदक आणि रौप्यपदक जिंकले, तर गिरिक बंगेराने रिलेमध्ये सुवर्णपदक जिंकले. लीना धुरीने सुवर्णपदक जिंकले, तर हर्ष राऊतने रिलेमध्ये रौप्यपदक जिंकले. या वेळी खेळाडूंनी हंगामाची सुरुवात चांगली केली असून, आणखी सुधारणा केली जाईल, असे प्रशिक्षक नीलेश पाटकर यांनी सांगितले.