दुचाकीत सापडला हरणटोळ
निसर्गप्रेमीने सापाची सुटका करून सुरक्षितरीत्या सोडले जंगलात
अंबरनाथ ता. २४ (वार्ताहर) : हरणटोळ ही प्रजाती भारतामध्ये जंगलात सापडली जाते. हा साप पूर्णपणे झाडावरच राहतो आणि जगतो. नेहमी वेलींवर किंवा फांद्यांवर दिसून येणारा हा साप अंबरनाथमध्ये चक्क एका दुचाकीत सापडल्याने परिसरात एकच खळबळ उडाली. अखेर निसर्गप्रेमींनी याची सुखरूप सुटका करून सापाला नैसर्गिक अधिवासात सोडले.
अंबरनाथ पूर्वेच्या शिवगंगानगरमधील अवध अपार्टमेंटमध्ये पार्किंगमधील एका दुचाकीच्या पुढच्या बाजूला साधारणतः तीन फुटाचा, हिरव्या रंगाचा हरणटोळ जातीचा निमविषारी साप घुसल्याची माहिती निसर्गप्रेमी अविनाश सुरसे यांना मिळाली होती. माहिती मिळताच सुरसे यांनी ताबडतोब त्या ठिकाणी जाऊन या सापाची सुटका करून नैसर्गिक अधिवासात सोडल्याचे सांगितले.
दरम्यान, हा साप घनदाट जंगल अथवा उष्ण ठिकाणी आढळतो. मात्र अचानक रहिवासी सोसायटीमध्ये आढळल्याने परिसरात एकच खळबळ उडाली. हरणटोळ हा केवळ एकाच हिरव्या रंगात सापडत नसून तो कधी हिरवा, पिवळा तर कधी तपकिरी अशा मिश्र रंगांमध्येसुद्धा सापडतो. त्याची जीभही लांब आणि गडद हिरव्या रंगाची असते. त्यामुळे तो आजूबाजूच्या स्थितीचा अंदाज घेत असतो. तसेच तो घाबरला असता स्वत:ला फुगवून मोठा दाखवण्याचा प्रयत्न करतो.