सायन, बेलासिस उड्डाणपुलांची कामे वेगाने पूर्ण करा
पालिका आयुक्त अभिजित बांगर यांचे निर्देश
सकाळ वृत्तसेवा
मुंबई, ता. २६ ः सायन उड्डाणपूल ३१ मे २०२६ पर्यंत आणि १५ डिसेंबरपर्यंत बेलासिस उड्डाणपुलाचे काम निश्चित कालमर्यादेत पूर्ण करा, असे आदेश पालिका आयुक्त (प्रकल्प) अभिजित बांगर यांनी दिले आहेत. सायन पूर्व- पश्चिम भागांना जोडणारा सायन उड्डाणपूल आणि ताडदेव ते नागपाडा आणि मुंबई सेंट्रल स्‍थानकाला जोडणारा बेलासिस उड्डाणपूल या दोन्‍ही रेल्‍वे उड्डाणपुलांच्‍या पुनर्बांधणीचे काम पालिकेने हाती घेतले आहे.
पालिका मुख्यालयात पालिका, वाहतूक पोलिस व रेल्वे विभागांच्या अधिकाऱ्यांची संयुक्त बैठक झाली. पोलिस सहआयुक्त (वाहतूक) अनिल कुंभारे यांच्या उपस्थितीत सायन व बेलासिस पूल या रेल्वे मार्गावरील उड्डाणपूल प्रकल्‍पांचा आढावा या बैठकीत घेण्यात आला.
सायन व बेलासिस उड्डाणपुलांच्या कामांना वेग मिळत असून, ही कामे गतीने आणि नियोजनबद्ध रितीने पूर्ण करण्यावर भर द्यावा.  रेल्वे प्रशासनासह समन्वय साधत कामांचे सुयोग्य नियोजन करावे, असे निर्देश अतिरिक्त महापालिका आयुक्त अभिजित बांगर यांनी संबंधित अधिकाऱ्यांना दिले आहेत. येत्या १५ डिसेंबरपर्यंत बेलासि‍स आणि ३१ मे २०२६ पर्यंत सायन उड्डाणपुलाची कामे पूर्ण झाली पाहिजेत, अशी ठोस कालमर्यादा बांगर यांनी निश्चित केली आहे.

१३ बांधकामे हटविण्याची कार्यवाही सुरू
पूल बांधकामास अडथळा ठरणारी १३ बांधकामे हटविण्यासाठी पर्यायी घरांचे वाटप करण्‍यात आले आहे. ही बांधकामे हटवण्‍यासंदर्भातील कार्यवाही विभागीय कार्यालयामार्फत सुरू आहे. पुलानजीकच्‍या एका गृहनिर्माण संस्‍थेची सीमा भिंत बाधित होत असून ती मोकळी जागा रस्‍त्‍यासाठी आवश्‍यक आहे. ती जागा उपलब्‍ध करून देण्‍याची कार्यवाही विभागीय कार्यालयामार्फत केली जाणार आहे.