नवी मुंबई, ता. २५ (वार्ताहर) : खारघर येथील डॉ. जी. के. डोंगरगावकर विधी महाविद्यालयाला मुंबई विद्यापीठ आणि बार कौन्सिल ऑफ इंडियाची नुकतीच मान्यता मिळाली आहे. बार कौन्सिल ऑफ इंडियाने या विधी महाविद्यालयाची अंतिम मान्यतेची प्रक्रिया पूर्ण करून तीन वर्षे कालावधीचा एलएलबी कोर्स सुरू करण्याची परवानगी दिली आहे. त्यामुळे नवी मुंबईच्या शैक्षणिक क्षेत्रात डोंगरगावकर विधी महाविद्यालयाची भर पडली आहे. या विधी महाविद्यालयातून आधुनिक न्यायव्यवस्थेला, समाज, व्यापारी, उद्योजक व अर्थव्यवस्थेला लागणारे विधिज्ञ घडविण्यात येतील, असे संस्थापक डॉ. डोंगरगावकर यांनी सांगितले. वकील व्यवसायात प्रत्यक्ष उतरणारे सर्वगुणसंपन्न वकील घडवणे ही मनोभावना असल्याचे या महाविद्यालयाच्या विकास आणि व्यवस्थापन समितीने व्यक्त केले आहे. शैक्षणिक वर्ष २०२५-२६ पासून डोंगरगावकर विधी महाविद्यालय सुरू होणार असल्याचे संस्थेचे कार्यवाहक ॲड. राजरत्न डोंगरगावकर यांनी सांगितले.