पारंपरिक कोवळी भाजी सण साजरा
जव्हार, मोखाडा, ठाणे, पालघर परिसर फुलला रानभाज्यांनी
जव्हार, ता. २५ (बातमीदार) ः आदिवासीबहुल अशा जव्हार तालुक्यात मॉन्सून सत्रात सर्वात पहिला सण हा कोवळी भाजीचा असून, तो उत्साहात साजरा केला जातो. शेतकरी आपल्या पिकांची पेरणी पूर्ण झाल्यावर व पाऊस पडल्यानंतर जंगलात, कडेकपारीत, माळरानावर निसर्गतः उगवते ती भाजी जमा करतात आणि गावदेवता, निसर्गदेवता यांना नैवेद्य म्हणून दाखवतात. हा सण मोठ्या उत्साहात जव्हार येथे मंगळवारी (ता. २४) साजरा झाला.
यंदा मे महिन्यात अवकाळी पाऊस झाल्याने रानभाज्या लवकर उगवल्या. डोंगराळ भाग, जंगल आणि माळरान परिसरात मोह, टोळंबा, शेवळी, बोंडारा, कुहरुळा, मोखा, पेंड्रा या उन्हाळी हंगामातील तर रान तेरा, आकऱ्या, उळसा, करटुल आंबटवेल, कोळु, कांचन, रान ज्योत, भरडा या भाज्या पावसाळ्यात मोठ्या प्रमाणावर येतात. सध्या जव्हार, मोखाडा, ठाणे, पालघर परिसर हा रानभाज्यांनी फुलून गेला आहे.

सणाचे नियोजन
हा सण कॅलेंडरप्रमाणे एखाद्या विशिष्ट तिथीलाच येतो असे नाही तर पाऊस पडल्यानंतर कोवळी भाजी रानात उगवली हे पाहून गावातील ज्येष्ठ नागरिक एकत्र येऊन सणाचे नियोजन करतात. ही भाजी आधी गावदेवीजवळ ठेवून नंतर सायंकाळी प्रत्येक घरोघरी शिजवली जाते. त्यानंतर कुलदैवताला नैवेद्य म्हणून ठेवली जाते. या सणाला नवीन लग्न होऊन सासरी गेलेल्या पोरी आवर्जून माहेरी आणल्या जातात.

निसर्गाचे आभार मानतो
कोवळी भाजी ही बलवर्धक, रोगप्रतिकारशक्तीत वाढ करणारी, मेंदू सतेज ठेवणारी व स्त्रियांच्या गर्भाशयातील विकार दूर करणारी आहे, असे जुनी जाणती माणसे म्हणतात. या सणाच्या दिवशी आदिवासी पाड्यावर तारपा नाच, कांबड नाच, ढोल नाच असून, यात बालकांपासून वृद्धांपर्यंत सर्वच जण नृत्य करतात व आपल्यापरीने हा शेतकरी निसर्गाला सामूहिकरित्या धन्यवाद देतो.

फोटोओळ
जव्हार : शहरात निरनिराळ्या रानभाज्या विक्रीकरिता दाखल झाल्या आहेत.