डहाणू, ता. २५ (बातमीदार)ः प्रस्तावित वाढवण बंदरासाठी वाढवण-वरोर समुद्रकिनाऱ्यावर भरती-ओहोटीचे पोलिस बंदोबस्तात ड्रोनद्वारे सर्वेक्षण करण्यात येणार होते; पण स्थानिकांबरोबर बंदरविरोधी संघर्ष समितीच्या कार्यकर्त्यांनी पथकाला पिटाळून लावले आहे.
प्रस्तावित वाढवण बंदरासाठी वरोर समुद्रकिनाऱ्यावरील भरावाचे कंत्राट आयटीडीसी कंपनीला देण्यात आले आहे. या कंपनीकडून पर्यावरणीय स्थिती जाणून घेताना त्याचा आराखडा बनविण्याचे काम सुरू आहे. याच अनुषंगाने पाच दिवस येणाऱ्या भरती-ओहोटीचे ड्रोनद्वारे सर्वेक्षण करण्यात येणार आहे. यासाठी पोलिस बंदोबस्तात भल्या पहाटे सर्वेक्षण पथक दाखल झाले; मात्र ग्रामस्थांबरोबर वाढवण बंदरविरोधी संघर्ष समितीच्या कार्यकर्त्यांनी सर्वेक्षणाला विरोध केल्याने पथकाला माघारी फिरावे लागले.