कासा, ता. २६ (बातमीदार)ः राज्यातील १०८ रुग्णवाहिका वाहनचालकांनी विविध मागण्यांसाठी सातत्याने निवेदने दिली आहेत; पण शासन व सेवा पुरवठादार कंपन्यांकडून त्याकडे दुर्लक्ष होत असल्याने १ जुलैपासून काम बंद आंदोलनाचा निर्णय चालकांनी घेतला आहे, त्यामुळे राज्यभरातील आरोग्य व्यवस्था कोलमडण्याची शक्यता आहे.
अत्यल्प वेतन व कामाच्या वेळा निश्चित नाहीत, तांत्रिकदृष्ट्या अयोग्य व धोकादायक अवस्थेतील रुग्णवाहिकांमुळे जीवावर उदार होत चालकांना काम करावे लागत आहे. त्यामुळे अपुऱ्या सुविधा तसेच सुरक्षा व्यवस्थेच्या अभावामुळे आझाद मैदानात आंदोलन करण्यात आले होते. या वेळी आरोग्य सेवा संचालकांनी चर्चा करून तोडगा काढण्याचे आश्वासन दिले होते. त्यानुसार सेवा पुरवठादारांना पत्रेही पाठवण्यात आली; मात्र सेवा पुरवठादारांकडून कोणताही प्रतिसाद मिळाला नसल्याने चालकांमध्ये तीव्र असंतोष आहे.
------------------------
१ जुलैपासून काम बंद
सरकार व सेवा पुरवठादार कंपन्यांना तातडीने संयुक्त बैठक घेऊन चालकांच्या मागण्यांवर सकारात्मक निर्णय घेण्याची विनंती सिटू संघटनेने केली आहे. तसेच मागण्यांकडे सातत्याने दुर्लक्ष होत असल्यामुळे काम बंदशिवाय पर्याय उरला नसून १ जुलैपासून राज्यातील १०८ रुग्णसेवा बंद ठेवण्यात येईल, असा स्पष्ट इशारा दिला आहे.