पालघर, ता. २६ (बातमीदार)ः पावसाळ्यात दूषित पाणी, अस्वच्छतेमुळे डायरिया, गॅस्ट्रो व कावीळसारखे आजार होण्याची शक्यता वाढते. त्यामुळे जिल्हा परिषदेमार्फत नागरिकांमध्ये स्वच्छतेच्या सवयी, ओआरएस आणि झिंक वापराविषयी जागरुकता वाढवण्यासाठी १६ ते ३१ जुलै कालावधीत ‘स्टॉप डायरिया’ अभियान राबविण्यात येणार आहे.
अतिसारावर मात करण्यासाठी परिसरातील स्वच्छता आवश्यक आहे. उघड्यावर शौचास जाणे, उघड्यावर विकले जाणारे अन्न खाणे, अशुद्ध पाणी पिणे, जेवणाआधी तसेच शौचानंतर स्वच्छतेकडे दुर्लक्ष केल्याने अतिसाराचा प्रादुर्भाव होतो. याच पार्श्वभूमीवर मोहिमेतून गावपातळीवर विविध जनजागृती उपक्रम राबविण्यात येणार आहेत. यात स्वच्छतेचे महत्त्व पटवून देण्यासाठी स्थानिक स्तरावर प्रयत्न केले जाणार आहेत. या अभियानाची जिल्हास्तरीय कार्यदल सभा मुख्य कार्यकारी अधिकारी मनोज रानडे यांच्या अध्यक्षतेखाली जिल्हा परिषद पालघर येथे घेण्यात आली. तसेच शून्य ते पाच वर्षांखालील बालकांमध्ये अतिसाराचे प्रमाण कमी करण्यावर भर दिला जाणार आहे. तसेच बालकांना ओआरएसचे पाकीट व झिंकच्या गोळ्या मोफत वितरित केल्या जाणार आहेत.
----------------------------------------------
प्रात्यक्षिकांमधून धडे
मोहिमेअंतर्गत अंगणवाडी केंद्र, शाळा व आरोग्य केंद्रांमध्ये ओआरएस घोळ तयार करण्याचे तसेच हात धुण्याची प्रात्यक्षिके दाखवली जाणार आहेत. यासह आरोग्य संस्थांमध्ये ‘ओआरएस कॉर्नर’ उभारण्यात येणार असून, जलशुष्कतेने बाधित रुग्णांवर तत्काळ उपचार केले जातील, अशी माहिती डॉ. सागर पाटील यांनी दिली. तसेच ओआरएसचा घोळ, झिंकच्या गोळ्यांचा वापर केल्याने जलशुष्कता कमी होते. स्तनपान करणाऱ्या मातांनी अतिसार चालू असतानाही बाळाला हलके, स्वच्छ अन्न द्यावे, असे निर्देश दिले.
------------------------------------------------
घोषवाक्यातून स्वच्छतेचा संदेश
‘अतिसारावर करा मात, स्वच्छता आणि ओआरएसची घेऊनी साथ’ या घोषवाक्याखाली ही मोहीम राबवली जाणार असून, नागरिकांनी अतिसाराची लक्षणे आढळल्यास तत्काळ नजीकच्या आरोग्य केंद्राशी संपर्क साधावा, असे आवाहन डॉ. संतोष चौधरी यांनी केले. या वेळी पावसाळ्यातील आजारांपासून संरक्षणासाठी प्रतिबंधात्मक उपाय महत्त्वाचे असल्याचे स्पष्ट केले.