खेकडे पकडण्यासाठी गेलेला तरुण खदाणीत पडला
सकाळ वृत्तसेवा
डोंबिवली, ता. २६ : दावडी येथील खदाणीजवळ खेकडे पकडण्यासाठी काही तरुण गेले होते. या वेळी किरण शिंदे हा (वय २४) खदाणीच्या कोपऱ्यावर गेला होता; मात्र तो परत आलाच नाही. तोल जाऊन पाण्यात पडला आणि बुडाला. किरण याचा भाऊ व मित्रांनी त्याचा शोध घेतला; मात्र तो सापडला नाही. अखेर बुधवारी (ता. २५) दुपारी अग्निशमन दलाला याची माहिती दिली. अग्निशमन दलाचे जवान सात तासांपासून किरण याचा शोध घेत होते; मात्र त्याचा अद्याप शोध लागला नसून अंधार पडल्याने शोधकार्य थांबवल्याची माहिती अग्निशमन दलाने दिली.
डोंबिवलीमधील दावडी भागात राहणारा किरण शिंदे हा मंगळवारी (ता. २४) मध्यरात्री दावडी येथील खदाणी परिसरात भाऊ व मित्रांसोबत खेकडे पकडण्यासाठी गेला होता. या वेळी त्याचा तोल जाऊन तो पाण्यात पडला. किरण पाण्यात बुडू लागताच त्याच्या भावाने व मित्रांनी त्याला वाचविण्याचे अथक प्रयत्न केले; मात्र तो पाण्यात बुडाला. रात्रभर त्याच्या मित्रांनी त्याचा शोध घेतला, यानंतर त्याच्या भावाने याची माहिती कुटुंबाला दिली. कुटुंबाने खदाणीजवळ धाव घेत स्थानिक नागरिकांच्या साहाय्याने त्याचा शोध घेतला; मात्र त्याचा शोध लागला नाही. अखेर बुधवारी दुपारी १२ वाजण्याच्या दरम्यान अग्निशमन दलाला याची माहिती देण्यात आली. घटनेचे गांभीर्य ओळखून डोंबिवली एमआयडीसीचे अग्निशमन दल घटनास्थळी दाखल झाले.