उल्हासनगर, ता. २६ (बातमीदार) : सेवानिवृत्तीला अवघे सहा दिवस बाकी असतानाच पदोन्नती झाल्याने ठाण्यातील राजेंद्र हेले यांची उल्हासनगर महापालिका सहाय्यक संचालक नगररचना या मुख्य पदावर नियुक्ती करण्यात आली आहे.
ठाणे महापालिकेत नगररचनाकार म्हणून काम करत असतानाच राजेंद्र हेले यांची सहाय्यक संचालक नगररचना पदावर पदोन्नती झाली आहे. उल्हासनगरात हे पद रिक्त असल्याने त्यांच्याकडे बुधवारी (ता. २५) येथील पदभार सोपवण्यात आला. विशेष म्हणजे हेले हे ३० जूनला जी शासकीय सेवेतून निवृत्त होत आहे. त्यांच्याकडे नगररचना विभागात काम करण्यासाठी जेमतेम सहा दिवस आहेत. त्यातही शनिवार आणि रविवार हे सुट्टीचे दिवस असल्याने राजेंद्र हेले यांच्याकडे बुधवार, गुरुवार, शुक्रवार आणि सोमवार हे चारच दिवस कामाचे आहेत. ललित खोब्रागडे यांचा उल्हासनगर महापालिका सहाय्यक संचालक नगररचना हा प्रभारी कार्यकाळ संपल्याने याच महिन्यात त्यांनी पदभार सोडला आहे. त्यांच्या जागी भिवंडी महापालिकेतील सहायक संचालक नगररचना अजय साबळे यांच्याकडे प्रभारी पदभार सोपवला होता. हेले हे पदोन्नतीवर या पदावर आल्याने साबळे यांच्याकडून तूर्तास तरी या कामाचा भार काढला आहे. ३० जूनला हेले सेवेतून निवृत्त झाल्यावर त्यांच्या जागी पुन्हा साबळे येतात की आणखीन दुसऱ्या अधिकाऱ्याची वर्णी लागते, हे पाहणे औत्सुक्याचे ठरणार आहे.